ٺٽو ايس آءِ سي وي ڊي ۾ اختلاف:  3 ڊاڪٽرن استعيفا ڏئي ڇڏي

ٺٽو (رپورٽ: اسماعيل ميمڻ) سول اسپتال ٺٽو ۾ دل جي تڪليف بابت ايس آئي سي وي ڊي پاران قائم چيسٽ پين يونٽ جي 3 مقرر ڊاڪٽرن ، چيسٽ پين يونٽ انچارج جي مبينا ناروا رويي کي جواز ڄاڻائي احتجاج طور استعيفيٰ ڏئي ڇڏي آھي. ان ڏس ۾ معلوم ٿيو آھي ته ٺٽو سول اسپتال ۾ 3 سال اڳ اين آئي سي وي پاران ايس آئي سي وي ڊي جي قائم ڪيل دل جي مرض واري چيسٽ پين يونٽ ۾ ھڪ انچارج سميت 4 ڊاڪٽرن جي مقرري ڪئي وئي آھي معلوم ٿيو آھي ته سول اسپتال ٺٽو جي احاطي ۾ قائم ڪيل ايس آئي وي سي ڊي جي چيسٽ پين يونٽ جي مقرر انچارج ڊاڪٽر جي ڊاڪٽرن سان اختيار ڪيل مبينا ناروي رويي ۽ کين تنگ ڪرڻ جو جواز ڄاڻائي چيسٽ پين يونٽ جي 3 ٽن ڊاڪٽرن ، ڊاڪٽر اياز حسين سمون ، ڊاڪٽر شاھ ريب قاضي ۽ ڊاڪٽر فتح علي سومرو پاران احتجاج طور تي لاڳاپيل اختيارين کي استعفائون اماڻيون ويون آھن جڏھن ته گذريل ھڪ ھفتي کان ڊاڪٽرن جي چيسٽ پين يونٽ ۾ نه اچڻ ۽ انھن جي ڏنل استعفائن تي ايس آئي وي سي ڊي جي لاڳاپيل اختيارين جي پڻ نوٽس نه وٺڻ ڪري ٺٽو ، سجاول ضلعن جي ڪيترن ئي دل جي بيمارين ۾ مبتلا مريضن کي علاج ۾ سخت ڏکيائين جو منھن ڏسڻو پئجي رھيو آھي.ٻئي طرف استعيفا ڏيندڙ ڊاڪٽر اياز حسين سمون استعيفائن جي تصديق ڪندي چيو آھي ته ھنن چيسٽ پين يونٽ جي انچارج ڊاڪٽر رفيق انصاري جي ناروا رويي ۽ کين تنگ ڪري ساڻن جارحاڻو رويو اختيار ڪرڻ تي احتجاج طور 10 ھين نومبر تي استعيفيٰ ايس آئي سي وي ڊي جي ايگزيڪيوٽو ڊائريڪٽر کي اماڻي ڇڏي آھي ۽ ھو ھفتي کان وٺي احتجاج طور ڊيوٽين تي نه پيا وڃن پر صحت کاتي جي اختيارين سميت ايس آئي سي وي ڊي جي انتظاميه ڪوبه نوٽيس ناهي ورتو نه ئي وري سندن موقف ٻڌڻ لاءِ ڪو ساڻن رابطو ڪيو آھي.