| ٽنڊي آدم ۾ امام موسيٰ ڪاظم جي شهادت جي نسبت سان باهه جو ماتم |
ٽنڊوآدم(ن پ ا) ٽنڊي آدم ۾ حضرت امام موسيٰ ڪاظم عليه السلام جي شهادت جي سلسلي ۾ حاجي شاھ ڪربلا معليٰ تي زوار زاهد حسين مري جي سرپرستي هيٺ باهه جي ماتم ڪرايو ويو جنهن لاءِ 12 فوٽ ڊگهي ۽ اڍائي فوٽ ويڪري چر کوٽي تيار ڪئي وئي، جنهن ۾ 50 مڻ ڪاٺيون ٻاري ٽانڊا تيار ڪيا ويا دعا گهرڻ بعد سيد قيصر حسين شاهه جي اڳواڻي ۾ عزادارن ٽانڊن تان گذري باهه جي ماتم جي شروعات ڪئي. ماتم دوران فضا يا حسينؑ ۽ يا موسيٰ ڪاظمؑ جي نعرن سان گونجندي رهي. ان موقعي تي باھ جو ماتم ڪرائيندڙ زوار زاهد حسين مري ڳالهائيندي چيو ته حضرت امام موسيٰ ڪاظم عليه السلام جي شهادت جي سلسلي ۾ ٽنڊوآدم ۾ پهريون ڀيرو باهه جي ماتم جي شروعات ڪئي آهي اڳتي به اهو سلسلو جاري رهندو. هن چيو ته اهلبيتؑ جي قربانين مان صبر، حق ۽ انصاف جو درس ملي ٿو. ان موقعي تي پاڪستان سميت سڄي دنيا جي امن، سلامتي، خوشحالي ۽ امتِ مسلمه جي ڀلائي لاءِ خصوصي دعائون پڻ گهريون ويون.