| پاڪستان اڃا به صحت جي سنگين مسئلن کي منهن پيو ڏئي: بلاول |
ڪراچي (اسٽاف رپورٽر) پاڪستان پيپلز پارٽي جي چيئرمين بلاول ڀٽو زرداري عوامي صحت جي نظام کي مضبوط ڪرڻ ۾ ڊاڪٽرن جي اهم ڪردار کي اجاگر ڪيو آهي ۽ چيو آهي ته صحت جي ماهرن کي صحت جي پاليسي، عوامي صحت جي سڌارن ۽ طبي تعليم جي شڪل ڏيڻ ۾ هڪ مؤثر آواز هجڻ گهرجي. هن زور ڏنو ته هڪ اهڙو سماج جيڪو پنهنجي ڊاڪٽرن، نرسن ۽ طبي عملي کي عزت ۽ تحفظ فراهم نٿو ڪري ان کي مهذب نه ٿو چئي سگهجي. پاڪستان پيپلز پارٽي جي چيئرمين بلاول ڀٽو زرداري ڪراچي ۾ جناح سنڌ ميڊيڪل يونيورسٽي جي ڪانووڪيشن کي خطاب ڪندي چيو ته هي موقعو نه رڳو گريجوئيٽس جي ذاتي زندگي ۾ هڪ اهم سنگ ميل آهي. ڊاڪٽرن کي خطاب ڪندي هن چيو ته توهان جا اڇا ڪوٽ ڪنهن به فرق جي علامت نه پر هڪ عهد آهن ته بنا تعصب جي خدمت ڪئي وڃي، بغير ڪنهن امتياز جي شفا ڏني وڃي ۽ سهولت تي رحم کي ترجيح ڏني وڃي. هن زور ڏنو ته طبي عملي جو نه رڳو شڪريو ادا ڪيو وڃي پر انهن کي عزت، تحفظ ۽ مناسب وسيلا پڻ فراهم ڪيا وڃن ته جيئن اهي پنهنجا فرض محفوظ طريقي سان ادا ڪري سگهن. هن چيو ته پاڪستان اڃا تائين صحت جي سنگين مسئلن کي منهن ڏئي رهيو آهي، جن ۾ ماءُ ۽ ٻار جي موت، غذائي کوٽ، ذهني صحت جي نظراندازي، موسمياتي تبديلي سان لاڳاپيل بيماريون ۽ شهري ۽ ٻهراڙي وارن علائقن ۾ علاج جي سهولتن ۾ عدم توازن شامل آهن. هن چيو ته انهن مسئلن جو حل نعرن سان نه پر باصلاحيت، اخلاقي ۽ عوامي جذبي وارن ڊاڪٽرن سان ممڪن آهي جيڪي اتي خدمت ڪرڻ لاءِ تيار آهن جتي انهن جي سڀ کان وڌيڪ ضرورت آهي. چيئرمين بلاول ڀٽو زرداري نوجوان ڊاڪٽرن کي يقين ڏياريو ته انهن جي آواز کي ملڪ جي صحت پاليسي، عوامي صحت جي سڌارن ۽ طبي تعليم جي جوڙجڪ ۾ ضرور شامل ڪيو ويندو. هن چيو ته پاڪستان کي اهڙن ڊاڪٽرن جي ضرورت آهي جيڪي نه رڳو قابل هجن پر ڄاڻ رکندڙ هجن، نه رڳو ذهين هجن پر اخلاقي به هجن، ۽ نه رڳو بهادر هجن پر جوابده به هجن. هن ڊاڪٽرن تي زور ڏنو ته پاڪستان کي توهان جي ضرورت آهي، سنڌ کي توهان جي ضرورت آهي ۽ انسانيت کي توهان جي ضرورت آهي. هن جناح سنڌ ميڊيڪل يونيورسٽي جي فيڪلٽي ۽ انتظاميا جي ڪردار جي پڻ تعريف ڪئي. ان موقعي تي وڏي وزير سيد مراد علي شاهه خطاب ڪندي چيو ته هيلٿ جي شعبي ۾ جناح سنڌ ميڊيڪل يونيورسٽي کي ترقي ڪندي ڏسي خوشي ٿي آهي. ڪانووڪيشن ۾ ايم بي بي ايس سميت صحت جي مختلف شعبن سان لاڳاپيل 570 کان وڌيڪ شاگردن ۽ شاگردياڻين کي ڊگريون ڏنيون ويون. ڪانووڪيشن ۾ شاندار ڪارڪردگي تي 11 گولڊ ميڊلز ڏنا ويا، جن مان 9 گولڊ ميڊلز فرسٽ پوزيشن ۽ 2 گولڊ ميڊلز بي ايم ايس آنرز لاءِ هئا، 10 سلور ميڊلز سيڪنڊ پوزيشن ۽ 9 برونز ميڊلز ٿرڊ پوزيشن تي حاصل ڪندڙ شاگردن کي ڏنا ويا. 9 شاگردن ۽ شاگردياڻين کي بيسٽ گريجوئيٽ جا اعزاز پڻ ڏنا ويا.