پاڪستان خلاف ڏڦيڙ روڪڻ برطانيا جي ذميواري آهي، غزا امن لاءِ تيار آهيون، حماس کي بي هٿيار ڪرڻ نه وينداسين: وفاقي سرڪار

اسلام آباد(بيورو رپورٽ) نائب وزيراعظم اسحاق ڊار چيو آهي ته پاڪستان خلاف ڏڦيڙ روڪڻ برطانيا جي ذميواري آهي، غزا امن لاءِ تيار آهيون، حماس کي بي هٿيار ڪرڻ نه وينداسين، اسلام آباد ۾ ميڊيا سان ڳالهائيندي هن چيو ته برطانيا کي بلڪل ٺيڪ “ڊيمارش” ڪيو، اها سندس ذميواري آهي ته هو اهڙن ڪمن کي روڪي،  جيڪڏهن ڪنهن ٻئي ملڪ ۾ ائين ٿيو ته ان جي هاءِ ڪمشنر کي به طلب ڪنداسين. هن چيو ته يورپي يونين سان 4 سالن کان ڪوبه فعال رابطو نه هو، برسلز ۾ اسٽريٽجڪ ڊائيلاگ شروع ٿيا،گڏيل قومن جي ڪنٽينرز کي انساني بنيادن تحت افغانستان وڃڻ جي اجازت ڏني آهي. اسحاق ڊار چيو ته افغانستان مان هڪ هزار عالمن جي ڪنهن به ملڪ خلاف دهشتگردي نه ڪرڻ واري فتويٰ جي آجيان ڪريون ٿا، ان اعلان بعد اسان فتويٰ جا اثر ظاهر ٿيڻ جو انتظار ڪري رهيا آهيون. هن چيو ته ماضي ۾ اسان 98 سيڪڙو دهشتگردي ختم ڪئي، 30، 40 هزار ويڙهاڪ واپس آيا ۽ ٻيهر حملا شروع ڪري ڏنا، ملڪ خوشحال بڻائڻو آهي ته دهشتگردن مان جان ڇڏائڻي پوندي. نائب وزيراعظم چيو ته معاشي صورتحال ۾ بهتري لاءِ دوست ملڪن جو سهڪار جاري آهي، يو اي اي سان هڪ ارب ڊالر بابت باضابطه ڳالهين جو سلسلو جاري آهي، گڏيل عرب امارات سان هڪ ارب ڊالر جي مالي ٽرانزيڪشن جلد مڪمل ٿيڻ جي اميد آهي، جنهن سان پاڪستان جي هڪ وڏي مالي ذميواري ختم ٿي ويندي. عالمي سطح تي پاڪستان جي حيثيت بابت ڳالهائيندي نائب وزيراعظم چيو ته الله تعاليٰ جي فضل ۽ ڪرم سان پاڪستان جي عالمي ساک ۾ نمايان بهتري آئي آهي. هي بهتري پاڪستان جي نتيجه خيز، متحرڪ ۽ مقصد تي ٻڌل سفارتڪاري جو نتيجو آهي. اسان کي 5 آگسٽ 2019 وارو واقعو ياد هو، جڏهن پلواما واقعي کان پوءِ پاڪستان تي الزام لڳائي هڪ بيانيو ٺاهيو ويو، ۽ پوءِ دنيا جي مختلف گادي وارن شهرن کي قائل ڪيو ويو ته ان جو ذميوار پاڪستان آهي. ان فضا ۾ ڀارت 5 آگسٽ 2019 تي پنهنجي آئين ۾ تبديلي آڻي جمون ۽ ڪشمير کي هڙپ ڪرڻ جي ڪوشش ڪئي. ڪشمير بابت گڏيل قومن جون قراردادون ۽ هڪ ڊگهي تاريخ موجود آهي، ۽ ڀارت پاڻ به هميشه مڃيندو رهيو آهي ته هن مسئلي جو فيصلو ٿيڻ باقي آهي. هن ڀيري پئدا ٿيل صورتحال ڀارت جي بدنصيب ۽ بدنيتي تي ٻڌل ارادن جي عڪاسي ڪري ٿي، جنهن بابت اڳتي هلي سنڌ طاس معاهدي جي حوالي سان به ڳالهه ڪئي ويندي.