پيرولاشاري (ن پ ا) پريس ڪلب پيرولاشاري جي سال 2026ع جي باڊي جي چونڊ سرپرست اعلي سيد امداد شاھ جي اڳواڻي ۾ ٿي گذري، جنهن ۾ صدر محمد ملاح، جنرل سيڪريٽري ياسين جوڻيجو، سينئر نائب صدر عاجز عظيم سنڌي، نائب صدر محمد ميراڻي، خزانچي ايم اسلم لاشاري، آڊيٽر نظير احمد پاڙهو، آفيس سيڪريٽري ظهور ذوالفقار خاصخيلي، اطلاع سيڪريٽري مظفر حسين چانڊيو، ڊپٽي جنرل سيڪريٽري سرفراز ٽالپر، ڪميٽي ميمبر اعظم چانڊيو ۽ ٻيا چونڊيا ويا.
لاڙڪاڻي ۾ سبزي خريد ڪرڻ لاءِ آيل اڌڙوٽ شخص دل بيهڻ سبب فوت
لاڙڪاڻو (بيورو رپورٽ) لاڙڪاڻي شهر جي علي گوهر آباد ٿاڻي جي حد سبزي منڊي واري علائقي ۾ سبزي خريد ڪرڻ لاءِ آيل اڌڙوٽ شخص دل بيهڻ سبب فوت ٿي ويو، اطلاع تي پوليس پهچي لاش کڻائي چانڊڪا اسپتال منتقل ڪري ڇڏيو جتي فوتي جي سڃاڻپ مراد واهڻ پاڙي واسي محمد حسن شيخ طور ٿي.
قمبر ۾ ٽريڪٽر جي ٽڪر ۾ موٽرسائيڪل سوار نوجوان فوت
قمبر (رپورٽر) قمبر جي ڳوٺ رب رکيو لاکو واسي 17 سالن جو نوجوان بلال مگسي موٽر سائيڪل تي قمبر اچي رهيو هيو ته دوست علي روڊ تي سامهون ايندڙ تيز رفتار ٽريڪٽر سان ٽڪر ٿي پيو، نتيجي ۾ ڌڪ لڳڻ سبب شديد زخمي ٿي پيو جنهن کي بروقت علاج لاءِ لاڙڪاڻي اسپتال داخل ڪرايو ويو، جتي هن ڪجھه ڪلاڪن بعد زخمن جا تاب نه سهندي دم ڏئي ڇڏيو.
حيدرآباد ۾ سينئر صحافي امتياز چانڊيو جو والد لاڏاڻو ڪري ويو
حيدرآباد (بيورو رپورٽ) حيدرآباد جي سينيئر صحافي امتياز چانڊيو ۽ اعجاز چانڊيو جو والد سرهو خان چانڊيو 85 ورھين جي ڄمار ۾ لاڏاڻو ڪري ويو. مرحوم جي جنازي نماز ڳوٺ جان محمد رند ۾ ادا ڪئي وئي، جنهن ۾ سياسي، سماجي اڳواڻن، صحافين ۽ علائقي واسين وڏي انگ ۾ شرڪت ڪئي. مرحوم پوئيرن ۾ چار پٽ ۽ ٻه نياڻيون ڇڏيون آهن. مرحوم جي وفات تي مختلف سياسي، سماجي ۽ صحافتي حلقن پاران گهري ڏک ۽ افسوس جو اظهار ڪيو ويو آهي.
نصيرآباد ۾ عوامي تحريڪ اڳواڻ ڪامريڊ رياض احمد ٻڌ جي ياد ۾ تعزيتي ميڙاڪو، ڀيٽا پيش
نصيرآباد (ن پ ا) عوامي تحريڪ جي سينيئر اڳواڻ ڪامريڊ رياض احمد ٻڌ جي ٽيجهي جي موقعي تي عوامي تحريڪ نصيرآباد تعلقي پاران ڳوٺ ننگر جهتيال ۾ تعزيتي ميڙاڪو ڪوٺايو ويو، تعزيتي ميڙاڪي ۾ اڳواڻن، ڪارڪنن، مٽن مائٽن، دوستن ۽ علائقي جي سياسي سماجي ورڪرن شرڪت ڪئي. ايڊووڪيٽ ساجد حسين مهيسر، ڪامريڊ غلام مصطفا چانڊئي، امداد پٺاڻ چيو ته ڪامريڊ رياض احمد ٻڌ سنڌي قوم جي ڀلائي ۽ نظام جي تبديلي لاءِ جاکوڙيندو رهيو. رياض ٻڌ شاھ عبداللطيف جو پارکو هيو. اڳواڻن چيو ته ڪارپوريٽ فارمنگ، سنڌو درياهه تي ٺهندڙ ڪئنالن سميت سمورن سنڌ دشمن منصوبن خلاف جدوجهد جاري رکي ويندي.