پيرو لاشاري ۾ پورهيت جي قتل خلاف هڙتال، سوين ماڻهن جو لاش رکي ڌرڻو، بدين روڊ بلاڪ

پيرو لاشاري (ن پ ا) پيرولاشاري ۾ گذريل رات بي دردي سان گوليون هڻي قتل ڪيل پورهيت نوجوان ڪيلاش ڪمار ڪولهي جو قاتل گرفتار نه ٿيڻ خلاف وارثن پاران پاڪستان ڪولهي اتحاد جي اڳواڻي ۾ ڪالهه صبح کان مين حيدرآباد بدين روڊ پيرولاشاري اسٽاپ جي مين چوڪ تي نوجوان جو لاش رکي ڌرڻو هنيو ويو، نوجوان جي قتل جي سوڳ ۾ پيرولاشاري شهر پڻ مڪمل طور بند ٿي ويو، ڌرڻي سبب روڊ جي ٻنهي پاسن کان وڏي تعداد ۾ گاڏين جون قطارون لڳي ويون، هزارين مسافر عورتون توڙي مرد سڄو ڏينهن پريشان ٿيندا رهيا، ڌرڻي ۾ اقليت برادري جي عورتن ۽ مردن سميت پيرولاشاري جي شهرين توڙي علائقي واسين شرڪت ڪري سڄو ڏينهن ڌرڻو جاري رکيو، 7 ڪلاڪن جو وقت گذرڻ کان پوءِ ايس ايس پي بدين قمر رضا جسڪاڻي ۽ علائقي جي معزز شخصيت رئيس مرزو خان دلواڻي ڌرڻي ۾ پهچي اڳواڻن سان ڳالهيون ڪندي پورهيت نوجوان ڪيلاش ڪمار جي قاتل کي 24 ڪلاڪن اندر گرفتار ڪرڻ جي خاطري ڪرائڻ بعد ميڊيا سان ڳالهائيندي چيو ته قاتل ڪيترو به طاقتور ڇونه هجي مگر قانون کان بچي نٿو سگهي، جلد نوجوان جي قاتل کي گرفتار ڪري قانون موجب سزا ڏياري ويندي، جنهن بعد نوجوان جي وارثن ۽ اڳواڻن پاران ڌرڻو ختم ڪرڻ جو اعلان ڪيو، جڏهن ته صبح کان شام تائين جاري رهندڙ ڌرڻي ۾ يا بي گناھ قتل ٿيل نوجوان جي گهر حد جو ڪو به چونڊيل نمائندو هن مهل تائين لڙي نه آيو آهي، ٻي پاسي سينيٽر ڪرشنا ڪولهي قتل ٿيل نوجوان جي تڏي تي پهچي قاتل جلد گرفتار ڪرائڻ جي خاطري ڪرائڻ بعد ميڊيا سان ڳالهائيندي چيو ته پورهيت نوجوان ڪيلاش ڪمار جي بي گناھ قتل جي خون سان انصاف ڪيو ويندو، ڪنهن به صورت ۾ نوجوان جو خون لوڙهڻ نه ڏينداسين، ان موقعي تي احتجاجي مظاهري جي اڳواڻي ڪندڙ پاڪستان ڪولهي اتحاد جي عهديدارن سيٺ لال چند ڪولهي، ڊاڪٽر پنهون ڪولهي، پهلاج ڪولهي، کيراج ڪولهي ۽ ٻين ميڊيا سان ڳالهائيندي چيو ته ايس ايس پي بدين جي يقين ڌياني ڪرائڻ بعد ڌرڻو ختم ڪندي ايس ايس پي بدين کي 24 ڪلاڪن جو الٽيميٽم ڏنو ويو آهي، اگر ايندڙ 24 ڪلاڪن اندر نوجوان جو قاتل گرفتار نه ٿيو ته هزارن جي تعداد ۾ ڪولهي برادري جا ماڻهو گڏ ٿي ڊي سي چوڪ بدين تي ٻيهر احتجاجي ڌرڻو هنيو ويندو جيڪو ڌرڻو جوابدار جي گرفتاري تائين جاري رکيو ويندو، جنهن جي زميدار بدين ضلعي انتظاميا هوندي.