پي ايس ايل جي نئين ٽيمن جي 6 جنوري تي نيلامي، انعام ۾ لکين ڊالر اضافو، فاتح ٽيم لاءِ 5 لک ڊالر

لاهور (اسپورٽس نيوز) پاڪستان ڪرڪيٽ بورڊ جي چيئرمين محسن نقوي پي ايس ايل فرنچائزز لاءِ وڏن انعامن جو اعلان ڪيو آهي. محسن نقوي سوشل ميڊيا تي جاري ڪيل هڪ بيان ۾ چيو ته هو ايندڙ ايڊيشن ۾ پي ايس ايل فرنچائزز لاءِ انعامن جو اعلان ڪندي خوش آهي. ٽورنامينٽ جي فاتح فرنچائز کي 5 لک ڊالر (14 ڪروڙ 9 لک رپيا) جڏهن ته رنر اپ فرنچائز کي 3 لک ڊالر (8 ڪروڙ 45 لک 40 هزار رپيا) ڏنا ويندا. پي سي بي چيئرمين چيو ته ڪرڪيٽ جي ترقي لاءِ ڪم ڪندڙ بهترين فرنچائز کي 2 لک ڊالر (5 ڪروڙ 63 لک 60 هزار رپيا) انعام ملندو. اچو ته سڀ گڏجي ڪرڪيٽ کي نئين بلندين تي وٺي وڃون. ٻئي طرف پاڪستان سپر ليگ جي ٻن نئين ٽيمن جي نيلامي ايندڙ سال 6 جنوري تي ٿيندي. 6 امڪاني شهرن جي فهرست جاري ڪئي وئي آهي. ٻن نئين امڪاني فرنچائزز لاءِ فيصل آباد، راولپنڊي، حيدرآباد، سيالڪوٽ، مظفر آباد ۽ گلگت جا نالا شارٽ لسٽ ڪيا ويا آهن. پاڪستان ڪرڪيٽ بورڊ جي مطابق، ٻن نئين پي ايس ايل ٽيمن جي نيلامي 6 جنوري 2026 تي ٿيندي ۽ صرف ٽيڪنيڪل طور تي قابليت رکندڙ ٻولي ڏيندڙ نيلامي ۾ حصو وٺندا. ان حوالي سان، سي اي او پي ايس ايل سلمان نصير جو چوڻ آهي ته پاڪستان سپر ليگ هڪ عالمي معيار جي ٽي 20 ليگ طور ترقي ڪري رهي آهي.