پي ٽي آءِ جا سوشل ميڊيا اڪائونٽس پاڪستان مخالف ٽرينڊ ٺاهڻ ۾ سرگرم آهن، ثبوت هٿ ڪري ورتا، هاڻ ڪارروائي ٿيندي: وفاقي سرڪار

اسلام آباد(بيورو رپورٽ) مملڪتي گهرو وزير طلال چوڌري چيو آهي ته پي ٽي آءِ جا سوشل ميڊيا اڪائونٽس ٽرينڊ ٺاهڻ لاءِ استعمال ٿي رهيا آهن. وفاقي گادي واري شهر ۾ پريس ڪانفرنس ڪندي طلال چوڌري چيو ته دهشتگرد تنظيمون سوشل ميڊيا جو استعمال ڪري رهيون آهن، حڪومت اظهار راءِ جي آزاديءَ تي يقين رکي ٿي، پر ڪجهه عناصر ملڪ جي سلامتيءَ خلاف سرگرم آهن۔ سوشل ميڊيا تي ادارن خلاف نفرت انگيز مهم هلائي پئي وڃي، ملڪ جي خودمختياريءَ تي ڪا به سوديبازي نه ڪئي ويندي، جڏهن ته پي ٽي آءِ سوشل ميڊيا کي هڪ خاص بيانئي لاءِ استعمال ڪري ٿي۔ مملڪتي گهرو وزير جو چوڻ هو ته هر هڪ ٽوئيٽ جي عيوض پئسا وٺي ٽرينڊ ٺاهيا وڃن ٿا، اظهار راءِ جي آزاديءَ جون به ڪجهه حدون آهن، ۽ ڪجهه ڪمپنين کي ٽرينڊز ۽ هيش ٽيگز نيلام ڪري وڪرو ڪيا وڃن ٿا۔ طلال چوڌري چيو ته پي ٽي آءِ جا سوشل ميڊيا اڪائونٽس ٻاهرين ملڪن مان هلايا پيا وڃن. اهي اڪائونٽس خاص طور ٽرينڊ ٺاهڻ لاءِ استعمال ڪيا وڃن ٿا ۽ گهڻا اڪائونٽس اتر آمريڪا، يورپ ۽ ڏکڻ ايشيا مان آپريٽ ٿي رهيا آهن۔ اهي ئي اڪائونٽس ٽي ٽي پي، بي ايل اي ۽ اسرائيل جي حق ۾ به ٽرينڊز ٺاهين ٿا، اسان وٽ ڪافي معلومات اچي چڪي آهي، سڀ ثبوت گڏ ڪري ورتا آهن، ۽ ٻاهرين ملڪن مان فنڊنگ منتقل ڪئي پئي وڃي۔ گهرو مملڪتي وزير وڌيڪ چيو ته پرڏيهه ۾ ويٺل ڪمپنين جا جعلي اڪائونٽس وڏي انگ ۾ موجود آهن، انهن کي خبردار ڪيو وڃي ٿو ته جيڪڏهن باز نه آيا ته سخت ڪارروائي ڪئي ويندي.
 

اسلام آباد(بيورو رپورٽ) ناڻي بابت مملڪتي وزير بلال اظهر ڪياني چيو ته هڪ جماعت اپوزيشن ۾ آهي، جنهن ملڪ کي ڊيفالٽ ڪرائڻ ۾ ڪا به ڪسر نه ڇڏي، ان جماعت آءِ ايم ايف کي باقاعده خط به لکيا، مستقل سطح تي پاڪستان جي دفاع خلاف ۽ پاڪستان مخالف بيانيو هلائيو پيو وڃي، اٺ ڏهه ڏينهن اڳ جو هڪ ٽوئيٽ اڃا تائين ٽوئيٽر تي موجود آهي، ان ٽوئيٽ ۾ جيڪا نفرت واري ٻولي استعمال ڪئي وئي، اها ملڪ دشمن زبان آهي. پي ٽي آءِ پاران پاڪستان تي مسلسل حملا ڪرڻ جي روايت بڻجي وئي آهي. مملڪتي وزير بلال اظهر ڪياني چيو ته هن وقت ملڪ ۾ سياسي استحڪام موجود آهي، ڪو به گروهه سياست جو لباس اوڍي ڪجهه به ڪري عدم استحڪام پيدا نٿو ڪري سگهي، ان گروهه جي سمورين رڪاوٽن ۽ شدت پسندي باوجود پاڪستان اڳتي وڌندو رهندو. ان گروهه جي ليڊر خلاف 190 ملين پائونڊ جو اوپن اينڊ شٽ ڪيس آهي. بلال اظهر ڪياني چيو ته خيبرپختونخواهه جي حڪومت کي به ساڳئي ڪم لاءِ استعمال ڪيو پيو وڃي. هڪ صوبي جي حڪومت کي رياست خلاف وڙهائڻ جي ڪوشش ڪئي پئي وڃي، سڀني ناڪام ڪوششن جي باوجود اسان اڳتي وڌنداسين ۽ ترقيءَ جو سفر طئي ڪنداسين.