| پي ٽي وي ۾ مالهي کي پروڊيوسر مقرر ڪري بنا ٽينڊر ٺيڪا جاري ڪرڻ جو انڪشاف: تفصيل طلب |
اسلام آباد(بيورو رپورٽ) اسلام آباد ۾ قومي اسيمبليءَ جي اطلاعات بابت اسٽيڊنگ ڪميٽيءَ جو اجلاس، پي ٽي ويءَ ۾ هڪ ماليءَ کي پروڊيوسر مقرر ڪرڻ جو، پنهنجي گهروارين ۽ مائٽن کي ڀرتي ڪرڻ، پي ٽي وي جي تزئين ۽ آرائش جو ڪم بغير ٽينڊر جي ٿيڻ جو انڪشاف ٿيو آهي. ڪميٽي ايندڙ اجلاس ۾ سمورا تفصيل طلب ڪري ورتا. قومي اسيمبلي انفارميشن ۽ نشريات بابت اسٽيڊنگ ڪميٽيءَ جو اجلاس چيئرمين پولين بلوچ جي صدارت هيٺ منقعد ٿيو. اجلاس ۾ وفاقي وزير اطلاعات عطا تارڙ انڪشاف ڪندي ٻڌايو ته پي ٽي وي ۾ هڪ مالهي کي پروڊيوسر مقرر ڪيو ويو. وفاقي وزير ٻڌايو ته اڳ پي ٽي وي ۾ ڪيترائي ماڻهو ويٺا هئاپر هاڻي پي ٽي وي ۾ ڪم ٿي رهيو آهي. پي ٽي وي ۾ ويٺل مافيا خلاف قدم کڻڻ سان فون ڪالن جو سلسلو شروع ٿي ويندو آهي. ڪميٽي پيمرا، پي ٽي وي، آءِ ٽي اين اي، انفارميشن ڪميشن ۽ ريڊيو پاڪستان ۾ سربراهن جي مقررين ۽ نئين ويج بورڊ ايوارڊ ۾ ڊگهي دير تي ڳڻتي جو اظهار ڪندي حڪومتي ڪارڪردگي تي سخت تنقيد ڪئي. ڪميٽي هدايت ڪئي ته ڪنهن به اداري جي سربراهه جي عهدي خالي ٿيڻ کان هڪ مهينو اڳ مقرري جو عمل شروع ڪيو وڃي. اجلاس دوران ڪميٽي ايندڙ اجلاس ۾ پي ٽي وي ۾ ٿيل تزئين و آرائش بابت سمورو لاڳاپيل رڪارڊ پيش ڪرڻ جي هدايت ڪئي. وفاقي وزير اطلاعات عطاالله تارڙ چيو ته پي ٽي وي ۾ مافيا ٺهي چڪي آهي، هاڻي يا ته مافيا رهندي يا مان. ڏهه هزار ملازمن سان ادارو نٿو هلي سگهي، گولڊن هينڊ شيڪ ئي واحد حل آهي. هن دعويٰ ڪئي ته اُن مٿان هڪ پئسي جي به ڪرپشن ثابت نٿي ڪري سگهجي. ڪميٽي ميمبرن پڻ چيو ته سياسي ڀرتين سبب سرڪاري ادارن ۾ مافيائون پيدا ٿيون آهن. اجلاس ۾ پي ٽي وي جي ڪارڪردگي تي الڳ اجلاس ڪرڻ جو فيصلو ڪيو ويو، جڏهن ته سب ڪميٽي ٺاهڻ بابت به مشاورت ڪئي ويندي.