| پ پ ايم پي ايز ۾ دنگل: سريندر ولاسائي جو اربابن تي قاتلن کي سوپاري ڏيڻ جو الزام |
ڪراچي(رپورٽ: فقير سليم) پ پ ايم پي اي ۽ بلاول ھائوس جي ميڊيا سيل جي انچارج سريندر ولاسائي پ پ ايم پي ايز جي ڀاءَ تي قتل ڪرائڻ لاءِ قاتلن کي سوپاري ( سوٿي ) ڏيڻ جو الزام ھڻندي گھرو وزير کي خط لکي ڇڏيو، سريندر والاسائي خط ۾ لکيو آهي ته کيس انساني حقن جي تحفظ، جبري شادين خلاف ڪاررواين ، سرن جي ڀٽن تي ڪم ڪندڙ مزدورن جي حقن ۽ ٻين سماجي ناانصافين خلاف آواز اٿارڻ سبب جان کي خطرا درپيش آهن. سريندر موجب سومر واري ڏينهن ارباب محمد عالم جي فرنٽ مين ولي محمد پلاٽ تي پهچي منهنجي مامي هرجي مل ۽ ٻين کي کليل ڌمڪيون ڏنيون، هن خط ۾ لکيو آهي ته مون اڳ ۾ پوليس جي مدد سان 2 نابالغ ڇوڪرين ساجده هالو ۽ دعا نهڙيو کي جبري شادي کان بچايو هو ، جنهن سبب ڄاڻايل ماڻهن کي کانئس رنجش پيدا ٿي. سريندر خط ۾ لکيو آهي ته هو في الحال قانوني ڪارروائي نٿو چاھي، سندس خط کي رڪارڊ تي رکيو وڃي، ٻئي پنهنجي اخبار طرفان رابطي تي سريندر ولاسائي ٻڌايو ته سندس موقف گھرو وزير ڏانھن اماڻيل خط ۾ موجود آھي، ھو في الحال وڌيڪ ڳالهائڻ نٿو چاھي، ھوڏانھن الزام ھيٺ آيل پ پ ايم پي ايز جي ڀاءُ ارباب عالم فون تي ڳالهائيندي چيو ته سريندر ولاسائي پاران لڳايل الزام بي بنياد آھن، اصل ۾ سريندر جو جھيڙو پنهنجي ميگھواڙ برادريَ جي ماڻهن سان آھي، بچو ميگھواڙ پورھيت آھي، جنهن جي پلاٽ تي سريندر ولاسائي قبضو پيو ڪرائي، اسان جو بچو ميگھواڙ سان ٻن ٽن پيڙھين جو تعلق آھي ھو دانهن کڻي آيو ھو، اسان کيس خاطري ڪرائي ته ناانصافي نه ٿيندي، هن چيو ته سريندر ۽ بچو ميگھواڙ ڪلوئي جا آھن، سريندر کي پلاٽ جي معاملي کي غط رنگ ڏيڻ بدران مسڪين ماڻهن سان گڏ بيھڻ گھرجي، هن چيو ته سريندر ولاسائي گھرو وزير کي خط لکي بھتر ڪيو آھي، اسانکي اميد آھي ته گھرو وزير معاملي جي انڪوائري ڪرائيندو، جنهن سان حقيقتون سامهون اچي وينديون، ھوڏانھن سريندر ولاسائي پاران سوشل ميڊيا تي رکيل بيان ۾ الزام لڳايو ھو ته ارباب عالم کيس قتل ڪرائڻ لاءِ بچو ۽ ٻين کي سوپاري ڏني آهي، جڏهن ته بچو ميگھواڙ پنهنجي جاري ڪيل وڊيو بيان ۾ سريندر ولاسائي جي الزامن کي رد ڪندي چيو آهي ته سندس پلاٽ تي سريندر ولاسائي وارا قبضو ڪرڻ ٿا چاھين، کيس انصاف فراھم ڪيو وڃي