| پ پ حڪومت چاھي ته سنڌ ترقي ڪري وڃي ها: اياز لطيف |
حيدرآباد(بيورو رپورٽ) حيدرآباد: قومي عوامي تحريڪ جي سربراھ اياز لطيف پليجو سان سندس رھائش گاھ تي آمريڪا، برطانيه، جاپان، فلپائن ۽ ڪينيڊا کان آيل سنڌين جي وفد ملاقات ڪئي. وفد ۾ سانا جو صدر ڊاڪٽر مقبول ھاليپوٽو، سنڌي ايسوسئيشن آف جاپان جو صدر ايوب مھر، لنڊن کان پروفيسر لال چند لوھاڻو، اوساڪا جاپان کان نثار مھر، ڪيناڊا کان ڊاڪٽر رئوف شيخ، منيلا فلپائين کان خادم حسين، ڪيناڊا کان ناصر جمال پٺاڻ، برطانيه کان شاد غلام علي، ڪيناڊا کان زاھد علي شاھ، فلپائين کان رباب مھر، جاپان کان محسن ايوب، اوساڪا کان ذوالفقار مھر ۽ ٻين شرڪت ڪئي. اياز لطيف پليجَي چيو ته دنيا ۾ پکڙيل سنڌي سنڌ جا سفير آھن. پنھنجي محنت ۽ ذھانت سان پاڻ مڃائي رھيا آھن. انھن ملڪن جي ترقي ۾ پنھنجو حصو شامل ڪري رھيا آھن. لطيف امن، رواداري ۽ محبت جو پيغام ڏنو آھي. دنيا کي جنگين نه امن جي ضرورت آھي. جيڪڏھن پيپلز پارٽي حڪومت چاھي ته سنڌ دنيا جي ترقي سان گڏ بيٺل ھجي ھا. وفاق سنڌ کي ڪرپشن جي ڪالوني بنائي سئو سال پوئتي ڌڪي ڇڏيو آھي. ھن چيو ته اڌ سنڌ ڌاڙيلن جي حوالي آھي. وسيلا، زمينون، درياھ وڪرو ڪيا ويا آھن. زراعت کي ھٿ وٺي تباھ ڪري آبادگارن ۽ ھارين جو معاشي قتل ڪيو ويو آھي. عورتون، ٻار ۽ اقليتون محفوظ ناھن. نياڻيون اغوا ڪري زبردستي مذھب تبديل ڪري شاديون ڪيون وڃن ٿيون. حڪمرانن سنڌ کي انساني حقن جي بدترين ڀڃڪڙين جو مثال بنائي ڇڏيو آھي. ھن چيو ته ٻاھر رھندڙ سنڌي سنڌ ۾ تعليم ۽ صحت جي بھتري لاءِ ڪردار ادا ڪن. ٻاھرين ملڪن ۾ اسڪالرشپ ۽ نوڪرين جا موقعا حاصل ڪرڻ جا رستا ڏيکارين. سنڌ جا نوجوان محنتي ۽ ذھين آھن. ميرٽ ذريعي اڳتي وڌڻ چاھين ٿا.اياز لطيف پليجي چيو ته پيپلزپارٽي سنڌ کي تباھ ۽ برباد ڪري ڇڏيو آهي سنڌ جي چيلھ ڀڃي ڇڏي آهي سنڌ ۾ گذريل 18 سالن کان وٺي حڪومت نه بادشاھت قائم آهي پيپلزپارٽي سنڌ کي پنهنجي جاگير سمجهي ٿي. پيپلزپارٽي ۽ زرداري کي مڳي آهي اھي سمجھن ٿا ته ست ڪڙور سنڌي سندن کيسي ۾ پيل آهن وڏيرا، سردار، جاگيردار، ڪرپٽ ڪامورا توهان جا غلام ٿي سگھن ٿا پيپلزپارٽي جو دماغ خراب آهي ست ڪڙور سنڌي غلام نه آهن.