| ڀارت پاران سنڌ طاس معاهدي جي هڪ طرفي ڀڃڪڙي ڏکڻ ايشيا جي امن لاءِ سنگين خطرو آهي: ڊار |
اسلام آباد(بيورو رپورٽ) نائب وزيراعظم اسحاق ڊار چيو آهي ته ڀارت پاران سنڌ طاس معاهدي تي هڪ طرفان قدم ڏکڻ ايشيا جي امن ۽ استحڪام لاءِ سنگين خطرا لائحق آهن، ڀارت پاڻي کي هٿيار طور استعمال ڪري رهيو آهي۔غير ملڪي سفارتڪارن کي خطاب ڪندي نائب وزيراعظم اسحاق ڊار چيو ته ڀارت بغير اڳواٽ اطلاع جي درياءِ چناب ۾ پاڻي ڇڏيو، معاهدي تحت ضروري ڊيٽا ۽ معلومات پاڪستان کي فراهم نه ڪئي وئي۔ اسحاق ڊار وڌيڪ چيو ته پاڪستان انڊس واٽر ڪمشنر جي ذريعي باضابطه سفارتي ۽ قانوني رستو اختيار ڪيو آهي، ڀارت جو تازي قدم پاڻي کي هٿيار طور استعمال ڪرڻ جي واضح مثال آهي۔ نائب وزيراعظم دنيا جي توجهه ڇڪائيندي چيو ته ڀارتي قدمن سبب پاڪستان جي غذائي سلامتي کي خطرو لاحق آهي۔ ڀارت کي سنڌ طاس معاهدي موجب پنهنجون ذميواريون پوريون ڪرڻ گهرجن۔ ڀارت منظم طريقي سان معاهدي کي ڪمزور ڪرڻ جون ڪوششون ڪري رهيو آهي۔ هن چيو ته ڪشن گنگا ۽ رتلي جهڙا منصوبا معاهدي جي فني شرطن جي خلاف ورزي آهن، ڀارت غير قانوني ڊيمن جي تعمير جاري رکي آهي، جنهن سبب ڀارت جي پاڻي ذخيرو ڪرڻ جي صلاحيت ۽ ان جو غير قانوني استعمال وڌي رهيو آهي۔ ڀارت جي آبي جارحيت پاڪستان جي سلامتي، معيشت ۽ ماڻهن جي زندگين لاءِ خطرو آهي، ڀارت هائيڊرولوجيڪل ڊيٽا ۽ گڏيل نگراني وارو عمل به روڪي ڇڏيو آهي۔ اسحاق ڊار چيو ته ڀارتي قدمن سبب پاڪستان کي ٻوڏن ۽ سوڪهڙي جي خطرن کي منهن ڏيڻو پيو آهي، ڀارتي آبي قدم انساني بحران کي جنم ڏيڻ جي صلاحيت رکن ٿا۔ سنڌ طاس معاهدو ڏکڻ ايشيا ۾ امن ۽ استحڪام جو اهم ذريعو آهي۔ پاڪستان جي نائب وزيراعظم پوري دنيا جي سفارتڪارن کي آگاهه ڪيو ته ڀارت پاران تڪرارن جي حل کان فرار عالمي قانونن جي نفي آهي۔ هن چيو ته ڀارتي گهرو وزير معاهدو بحال نه ڪرڻ ۽ پاڻي جو رخ موڙڻ جو اعلان ڪيو آهي۔ پاڪستان واضح ڪري ڇڏيو آهي ته پاڻي روڪڻ يا ان جو رخ موڙڻ جنگي قدم سمجهيو ويندو۔ هن واضح ڪيو ته پاڪستان هي معاملو بار بار گڏيل قومن جي سلامتي ڪائونسل ۾ اٿاريو آهي، پاڪستان تڪرارن جي پرامن حل جو خواهشمند آهي، پر پنهنجي آبي حقن تي ڪو به سمجهوتو نه ڪندو۔ عالمي برادري سنڌ طاس معاهدي جي مڪمل بحالي لاءِ پنهنجو ڪردار ادا ڪري۔