ڄمڻ، مرڻ، ٻليون ڌارڻ تي پابندي واري عجيب جاءِ

اوسلو (انٽريسٽنگ نيوز) سوالبارڊ ناروي ۾ هڪ خوبصورت ٻيٽ آهي جيڪو اتر قطب جي ويجهو واقع آهي. ان کي “قطبي رڇن جي سرزمين” سڏيو ويندو آهي جتي رڇن جو تعداد انسانن کان تمام گهڻو آهي. هي دنيا ۾ واحد جڳهه آهي جتي ڪنهن به قوميت يا پرڏيهي کي رهڻ يا ڪم ڪرڻ لاءِ ويزا حاصل ڪرڻ جي ضرورت ناهي. دنيا جو اتريون برفاني علائقو، سوالبارڊ، هڪ ڀيرو ٻيهر پنهنجي منفرد خاصيتن جي ڪري عالمي ڌيان حاصل ڪيو آهي. هتي رهڻ لاءِ اهو ضروري آهي ته ان شخص وٽ رهڻ ۽ ڪم ڪرڻ جي جاءِ هجي. سوالبارڊ جي مکيه شهر لونگيئربيئن ۾ لڳ ڀڳ 2,400 ماڻهو رهن ٿا جيڪي 50 کان وڌيڪ قوميتن جا آهن. هڪ اندازي مطابق علائقي ۾ 2,600 کان 3,600 رڇ آهن، تنهن ڪري شهر ڇڏڻ وقت هٿيار کڻڻ ضروري سمجهيو ويندو آهي. سوالبارڊ جو هڪ ٻيو حيرت انگيز پهلو اهو آهي ته هتي نه ٻار ڄڻڻ جي ۽ نه ئي دفن ڪرڻ جي اجازت آهي. سخت ٿڌ جي ڪري، لاش سڙي نه ٿا وڃن، جنهن جي ڪري بيمار ماڻهن ۽ حامله عورتن کي مرڪزي ناروي منتقل ڪيو ويندو آهي. ان کان علاوه مقامي ماحول جي حفاظت لاءِ، هتي ٻليون رکڻ تي به پابندي آهي ڇاڪاڻ ته اهي مقامي پکين لاءِ خطرو ٿي سگهن ٿيون. ساڳئي علائقي ۾ قائم ڪيل سوالبارڊ گلوبل سيڊ والٽ ۾ دنيا جي چوڌاري فصلن جا 900,000 کان وڌيڪ ٻج محفوظ ڪيا ويا آهن، ته جيئن عالمي بحران جي صورت ۾ زرعي نظام کي بحال ڪري سگهجي. سوالبارڊ ۾ فطرت جو هڪ ٻيو عجيب نظارو ڏسي سگهجي ٿو، جتي سال جا لڳ ڀڳ ڇهه مهينا مسلسل ڏينهن جي روشني هوندي آهي، جڏهن ته باقي ڇهه مهينا مڪمل طور تي اوندهه هوندي آهي.