ڊائريڪٽوريٽ پرائيويٽ اسڪولز داخلا پاليسي تي عمل ڪرائي: هاءِ ڪورٽ اينٽي ڪرپشن کي اسڪولن ۾ وڃڻ کان روڪي ڇڏيو

سکر (بيورو رپورٽ) سنڌ هاءِ ڪورٽ سکر بئنچ سڄي سنڌ ۾ خانگي اسڪولن ۾ 10 سيڪڙو غريب مستحق ٻارن جي داخلا تي عملدرآمد ڪرائڻ لاءِ درخواستون اڪلائي ڇڏيون.  عدالت پاران اينٽي ڪرپشن کي نجي اسڪولن ۾ وڃڻ کان روڪيندي ڊائريڪٽوريٽ آف پرائيويٽ اسڪول ايجوڪيشن کي عملدرآمد ڪرائڻ جو حڪم ڏئي ڇڏيو. عدالت ايڊيشنل ايڊووڪيٽ جنرل سنڌ، ايڊووڪيٽ علي گل عباسي جي استدعا تي اينٽي ڪرپشن کان جاچ ڪرائڻ وارو اختيار واپس ڪري ڇڏيو. سنڌ هاءِ ڪورٽ سکر جي جسٽس عدنان اقبال چوڌري ۽ جسٽس محمد جعفر رضا ته ٻڌل ٻه رڪني آئيني بينخ ڪيس جي ٻڌڻي ڪئي. عدالت ۾ ايڊيشنل ايڊووڪيٽ جنرل سنڌ علي رضا بلوچ،ايڊوڪيٽ علي گل عباسي، ايڊووڪيٽ جهانگير ڪلهوڙو، نجي اسڪول ايسوسيئيشن توڙي لاڳاپيل عملدارپيش ٿيا. عدالت کي آگاهي ڏني وئي ته پرائيويٽ اسڪول جي ڊائريڪٽرن پاران عدالتي فيصلي تي عملدرآمد ڪرايو پيو وڃي، 10 سيڪڙو اسڪالرشپ نه ڏيندڙ اسڪولن خلاف ڪارروائي ڪئي ويندي. پرائيويٽ اسڪول انتظاميا پاران اينٽي ڪرپشن جي جاچ تي اعتراض واريو، يونيفارم ۾ ٽيم هئڻ سبب تعليمي عمل متاثر ٿي رهيو آهي. اينٽي ڪرپشن پرائيويٽ اسڪولن ۾ ائين داخل نه ٿيندي، استادن کان پڇا ڳاڇا نه ڪئي ويندي. ايدووڪيٽ علي گل عباسي مطابق پرائيويٽ اسڪول ايجوڪيشن ئي ان معاملي کي ڏسندو ۽ اينٽي ڪرپشن جو ڪردار ختم ڪيو ويو آهي. ڊسمبر 2025 تي مفت تعليم واري ڪوٽا تي عمل نه ٿيڻ متعلق اينٽي ڪرپشن کي هدايت جاري ڪئي هئي. جنهن تي ڪراچي کان ڪشمور تائين اينٽي ڪرپشن ڇاپا هڻڻ شروع ڪيان. پرائيويٽ اسڪولن ۾ 95 سيڪڙو عملو عورتن جو هوندو آهي. اينٽي ڪرپشن انهن کي حراسان ڪيون، ڄڻ انهن ڪا ڪرپشن ڪئي هجي. جنهن تي پرائيويٽ اسڪول ايسوسيشن، جوائنٽ ايڪشن ڪميٽي ۽ سنڌ جي 22 پرائيويٽ اسڪولن جي آرگنائيزسيشن ۽ 20 هزار کان وڌيڪ پاران عدالت سان رجوع ڪيو ويو. عدالت ۾ موقف اختيار ڪيو ويو ته اسان فنڊن ۾ ڪي به گهوٻيون ناهن هنيون. اسان آئيني ذميواري پوري ڪري رهيا آهيون. عدالت درخواست تي دليل ٻڌڻي بعد پرائيويٽ اسڪولن جي حق ۾ فيصلو ڏيندي اينٽي ڪرپشن جي ڪردار کي ختم ڪري ڇڏيو آهي. عدالت اينٽي ڪرپشن کان جاچ واپس ڪندي پرائيويٽ اسڪول ڊائريڪٽوريٽ کي اسڪولن جي جاچ ڪري رپورٽ ڏيڻ جو حڪم ڏئي ڇڏيو.