| ڪارڪن فڪر نه ڪن سڀ ياد رکنداسين، حساب ورتو ويندو: شيخ حسينه |
نئين دهلي(م ڊ) بنگلاديش جي اڳوڻي وزيراعظم ۽ عوامي ليگ جي اڳواڻ شيخ حسينه واجد عدالت طرفان موت جي سزا واري فيصلي کي رد ڪندي چيو آهي ته اسان سڀ ڪجهه ياد رکنداسين، سڀني کان حساب ورتو ويندو، الله زندگي ڏني آهي اهوئي واپس وٺندو، ڪارڪنن کي چوان ٿي ته فڪر نه ڪريو اها وقت جي ڳالهه آهي، يقين آهي ته مان انهي جو بدلو ضرور وٺي سگهندس. هن چيو ته نوبل انعام ماڻيندڙ محمد يونس جي قيادت هيٺ عبوري حڪومت اسان جي پارٽي کي ختم ڪرڻ چاهي ٿي، اهو ايترو آسان نه آهي، عوامي ليگ بنياد کان اڀري آهي ڪنهن به ناجائز قبضو ڪندڙن جي کيسي مان نه. حسينه واجد چيو ته منهنجي حامين بنگلاديش ۾ احتجاج خلاف پاڻمرادو رد عمل ظاهر ڪيو. اسان ڪرپٽ، عسڪري ۽ قاتل يونس ۽ ان جي مددگارن کي ڏيکارينداسين ته بنگلاديش ڪهڙي طرح تبديل ٿي سگهي ٿو، ماڻهو انصاف ڪندا. هن چيو ته بنگلاديش جي آئين موجب چونڊيل نمائندن کي زبردستي عهدن تان هٽائڻ ڏوهه آهي. محمد يونس منصوبه بندي سان ائين ڪيو. حسينه واجد چيو ته منهنجي حڪومت گذريل سال احتجاج جي دوران شاگردن جا مڃيا ڪيا، پر مسلسل نوان مطالبا سامهون ايندا رهيا جن جو مقصد انتشار پکيڙڻ هو. پنهنجي حڪومت ۾ انساني حقن جي ڀڃڪڙين جي الزامن کي رد ڪندي هن چيو ته مون 10 لک روهنگيا کي پناهه ڏني، مون کي انساني حقن جي ڀڃڪڙين جو مرتڪب قرار ڏئي رهيا آهن. حسينه واجد چيو ته محمد يونس جي قيادت هيٺ حڪومت پوليس، عوامي ليگ جي ڪارڪنن، وڪيلن، صحافين ۽ ثقافتي شخصيتن جي قاتلن کي معافي ڏني پر اهڙن ماڻهن کي معافي ڏئي اهو پاڻ الزامن جي زد ۾ اچي ويو آهي. مان پنهنجا والدين، ڀائر، ڀينرون وڃائي چڪي آهيان انهن منهنجو گهر ساڙي ڇڏيو. حسينه واجد زور ڏيندي وڌيڪ چيو ته اهڙا عدالتي فيصلا مون کي نٿا روڪي سگهن.