ڪراچي زو ۾ نوان پڃرا ٺهي ويا: ٽڪيٽ في 50 رپيا مقرر

ڪراچي (اسٽاف رپورٽر) ڪراچي جي ميئر مرتضيٰ وهّاب چڙيا گهر ۾ نئين تفريحي سهولتن جو افتتاح ڪري ڇڏيو، ان موقعي تي ميڊيا سان ڳالهائيندي ميئر چيو ته چڙيا گهر  شهر جو قيمتي اثاثو آهي، جنهن کي بين الاقوامي معيار مطابق جديد، محفوظ ۽ فطرت سان هم آهنگ تفريحي ۽ تعليمي مرڪز بڻائڻ لاءِ عملي قدم کنيا پيا وڃن. هن چيو ته ڪيترن ڏهاڪن کان ڪراچي چڙيا گهر جون اندروني گهٽيون، پڃرا ۽ سهولتون زبون حالي جو شڪار هيون، اسان ٻه ايڪڙ ايراضيءَ تي جديد پڃرا تعمير ڪيا ويا آهن، جتي چاندِي ۽ راڻي کي کليل فضا ۾ قدرتي ماحول ۾ رکيو ويو آهي. هن چيوته انهن پڃرن ۾ جديد بليٽ پروف شيشا لڳايا ويا آهن، جڏهن ته جانورن جي پاڻيءَ ۾کيڏڻ ۽ آرام ڪرڻ لاءِ به خاص انتظام ڪيا ويا آهن. هن چيو ته چڙيا گهر ۾ جانورن لاءِ بهتر خوراڪ، سنڀال ۽ صحت بابت قدم کنيا پيا وڃن،  وڌيڪ وٽرنري ڊاڪٽرن جون خدمتون به حاصل ڪيون پيون وڃن، هن چيو ته چڙيا گهر جي ريپٽائل هائوس کي رنگ روغن بعد ٻيهر عوام لاءِ کوليو ويو آهي، جڏهن ته شهرين خاص ڪري سيلفي جي شوقينن لاءِ خوبصورت برج پڻ تعمير ڪيو ويو آهي. وزيٽرز جي سهولت لاءِ جديد واڪ ويز، ويهڻ جا هنڌ ۽ معلوماتي سائن بورڊ لڳايا پيا وڃن. هن چيو ته چڙيا گهر ۾ ٻارن لاءِ داخلا في 30 ۽ وڏن لاءِ 50 رپيا مقرر ڪئي وئي آهي، هن چيو ته ڪنهن به نئين وڏي جانور جي خريداري جو فيصلو ناهي ٿيو، هن وقت رڳو  موجوده جانورن جي سنڀال تي ڌيان ڏنو پيو وڃي. ميئر چيو ته هڪ طبقو رولو ڪتا مارڻ جو مخالف آهي، ٻئي پاسي متاثر والدين وري ڪتا مارڻ چاهين ٿا،انهي مسئلي جو متوازن حل ڪڍڻ ضروري آهي.