ڪراچي ماسٽر پلان 2020ع تي ڪڏهن عمل ٿيندو؟ هاءِ ڪورٽ پاران مڪاني کاتي کان جواب طلب   

ڪراچي(اسٽاف رپورٽر) سنڌ هاءِ ڪورٽ ڪراچي اسٽريٽجڪ ڊولپمينٽ پلان 2020ع تي عمل نه ٿيڻ خلاف داخل درخواست تي مڪاني کاتي جي سيڪريٽري کان 15 جنوري تائين جواب طلب ڪري ورتو، درخواستگذار جي وڪيل چيو ته ڪراچي جي آبادي 3 ڪروڙ تي پهچڻ باوجود  ماسٽر پلان تي عملدرآمد نٿو ڪيو وڃي، واٽر ڪميشن به شهر جو ماسٽر پلان نوٽيفاءِ ڪرڻ لاءِ چيو آهي  هن  چيو ته 2 ڏينهن اڳ  3 ورهين جو ٻالڪ  کليل گٽر ۾ ڪري فوت ٿي ويو آهي، جنهن تي جسٽس عدنان اقبال چوڌري چيو ته 10 ادارا هوندا آهن پر انهن ۾ ڪا به ڪوآرڊينيشن ناهي هوندي، ڇا ماسٽر پلان تي مڪاني کاتي  کي عمل ڪرائڻو آهي؟ جنهن تي درخواستگذار جي وڪيل چيو ته عدالت ايڊووڪيٽ جنرل کي حلف نامو جمع ڪرائڻ جو حڪم ڏنو هو، موٽ ۾  سنڌ حڪومت جي وڪيل چيو ته ماسٽر پلان 2027ع ۾ مڪمل ٿيندو ، هنن 2024ع ۾ درخواست داخل ڪئي آهي، عدالت اي جي سنڌ کان پڇيو ته ماسٽر پلان تي  ڪير عمل ڪرائيندو؟  سرڪاري وڪيل چيو ته مڪاني ادارن جو ايڪٽ اچي ويو آهي، ماسٽر پلان وارو ادارو به مڪاني کاتي وٽ آهي، اسان ڪا به انڊرٽيڪنگ ناهي ڏني، انهي کي ختم ڪيو وڃي, درخواستگذار جي وڪيل طارق منصور چيو ته ماسٽر پلان تي عمل لاءِ هڪ لک ماڻهن صحيحون ڪيون آهن، عدالت ٻڌڻي 15 جنوري تائين ملتوي ڪري ڇڏي. هوڏانهن هاءِ ڪورٽ ۾ ميڊيا سان ڳالهائيندي سنڌ اسيمبلي ۾ مخالف ڌر جي اڳواڻ علي خورشيدي چيو  ته اسان ڪراچي سميت سنڌ جي عوام کي ماسٽر پلان ڏنو، جنهن تي هن مهل تائين ڪا به اڳڀرائي ناهي ٿي، هن چيو ته هڪ ماسٽر پلان گزٽ ۾ ڇپجي چڪو آهي، انهي کي نظر انداز ڇو پيو ڪيو وڃي؟ انهي تي عملدرآمد نه ڪرڻ بدنيتي آهي، سنڌ حڪومت جي ترجيح ڪجهه ٻي آهي، هن چيو ته  ماسٽر پلان تي عمل نه ٿيڻ شهرين کي حقن کان پري رکڻ برابر آهي، اسان ڪراچي جو ڪيس وڙهي رهيا آهيون ۽ وڙهندا رهنداسين ،بدقسمتي سان عددي اڪثريت رکندڙن کي شهر جو ڪو فڪر ناهي.