| ڪراچي ۾ ٽينڪر ۽ هائيڊرنٽس ختم ڪرڻ جو اعلان: شهرين کي لائنن ذريعي پاڻي ڏيڻ جو فيصلو |
ڪراچي (رپورٽ: الطاف چنو) ميئر ڪراچي مرتضيٰ وهاب شهر ۾ ٽينڪرن ۽ سرڪاري واٽر هائيڊرنٽس ذريعي پاڻي جي فراهمي ختم ڪرڻ جو اهم اعلان ڪيو ويو آهي، جنهن تحت ايندڙ ٻن هفتن اندر ڪراچي جا ست ئي هائيڊرنٽس بند ڪيا ويندا. ميئر ڪراچي واٽر ڪارپوريشن جي اعليٰ عملدارن کي هدايتون جاري ڪندي چيو آهي ته شهرين کي متبادل نظام تحت لائينن ذريعي پاڻي مهيا ڪيو وڃي. مرتضيٰ وهاب جو چوڻ آهي ته ٽينڪرن ذريعي پاڻي فراهم ڪرڻ مستقل حل ناهي ۽ ان سبب شهري سالن کان سخت مشڪلاتن کي منهن ڏئي رهيا آهن. هن چيو ته شهرين کي سندن درن تائين پائپ لائينن ذريعي پاڻي پهچائڻ ئي واحد پائيدار حل آهي، جنهن لاءِ فوري قدم کنيا پيا وڃن. ميئر ڪراچي موجب شهر ۾ موجود واٽر هائيڊرنٽس هر مهيني لڳ ڀڳ 300 ملين رپين جي آمدني پيدا ڪندا رهيا آهن، جڏهن ته انهن جو ٺيڪو گذريل سال ئي ختم ٿي چڪو آهي. هن واضح ڪيو ته هاڻي نوان ٺيڪا جاري نه ڪيا ويندا ۽ شهرين کي ٽينڪرن جي رحم وڪرم تي ڇڏڻ بدران مستقل نظام ڏنو ويندو.هن اميد ظاهر ڪئي ته نئون نظام مڪمل طور تي لاڳو ٿيڻ بعد ڪراچي واسي ٽينڪرن جي مهانگي ۽ غير يقيني فراهمي کان نجات حاصل ڪري سگهندا.
| ڪيترائي علائقا پائپ لائينن کان محروم، پاڻي ڪيئن پهچندو؟ |
ڪراچي: واٽر ڪارپوريشن ذريعن موجب هن وقت شهر کي 650 ايم جي ڊي پاڻي جي گهرج آهي جنھن مان 650 ايم جي ڊي پاڻي واٽر ڪارپوريشن جي سسٽم ۾ موجود هجڻ جي دعوا ڪئي پئي وڃي، جنھن مان به ٽينڪرن ذريعي ڪراچي جي مختلف علائقن ۾ 18 ملين گيلن روزانو پاڻي فراهم ڪيو ويندو آهي، جيڪو هائيڊرنٽس بند ٿيڻ بعد مڪمل طور تي روڪيو ويندو. ان فيصلي سان خاص طور تي اهي علائقا متاثر ٿيندا، جتي اڃا تائين پائپ لائينن وسيلي باقاعده پاڻي فراهمي ممڪن ناهي. جڏهن ته شهر جي ڪيترن ئي علائقي م واٽر ڪارپوريشن پاران 40 سال اڳ وڇايل لائينون ناڪاره هجڻ ۽ دٻجڻ سبب پاڻي فراهمي سواليا نشان بڻيل آهي. ڇا مقرر وقت اندر متبادل نظام تيار ڪري ڪراچي جي لکين شهرين کي پاڻي جي بحران کان بچائي سگهندي يا نه.
ڪراچي ميٽروپوليٽن ڪارپوريشن کي مڪمل طور جديد ڪمپيوٽرائيزڊ بڻائڻ جو اعلان
ڪراچي (اسٽاف رپورٽر) ميئر ڪراچي مرتضيٰ وهاب ڪراچي ميٽروپوليٽن ڪارپوريشن کي مڪمل طور جديد ڪمپيوٽرائيزڊ بڻائڻ جو اعلان ڪندي چيو آهي ته بلديه عظمیٰ جا سڀ مالي ۽ انتظامي معاملا هاڻي ڊجيٽل نظام تحت آندا ويندا. هن موجب پينشن، پگهارون، ترقياتي فنڊ، دڪانن ۽ زمينن جا چالان، جرمانا ۽ ڪرائي جي وصولي به آن لائن ڪئي ويندي. ميئر ڪراچي اي بي ايس ڊائريڪٽوريٽ ۽ ڪنٽرولر جنرل آف اڪائونٽس جي وفد سان ملاقات بعد پينشن سسٽم کي جلد ڊجيٽل ڪرڻ ۽ ڊولپمينٽ پيمينٽ سسٽم کي SAP سان ڳنڍڻ جي هدايت جاري ڪئي آهي. هن چيو ته مالي شفافيت ۽ انتظامي بهتري بلديه عظمیٰ جي اولين ترجيح آهي.