ڪراچي ۾ 230 شادي هالن جي غير قانوني اڏاوت جو انڪشاف: 3 ڏينهن ۾ دستاويز طلب     

ڪراچي (رپورٽ: الطاف چنا) سنڌ بلڊنگ ڪنٽرول اٿارٽي (ايس بي سي اي) جي ڊائريڪٽر جنرل مزمل هاليپوٽو شادي هالن بابت نيب کي جمع ڪرايل رپورٽ ۽ ان حوالي سان ميڊيا تي نشر ٿيندڙ خبرن جو سخت نوٽيس وٺندي اهم هدايتون جاري ڪري ڇڏيون آهن. ايس بي سي اي جي ترجمان موجب شهر جي سمورن شادي هالن کي هدايت ڪئي وئي آهي ته اهي ٽن ڏينهن اندر پنهنجا لاڳاپيل دستاويز جمع ڪرائين، ٻي صورت ۾ سندن خلاف بنا ڪنهن دير جي ڪارروائي ڪئي ويندي.ترجمان موجب سنڌ هاءِ ڪورٽ جي حڪمن تحت شادي هالن کي فقط ڪمرشل مقصدن لاءِ مشروط اجازت ڏني وئي هئي،  ڪيترن ئي شادي هالن اڃا تائين ڪمرشلائيزيشن جا چالان جمع نه ڪرايا آهن، جيڪو سڌي طرح قانون جي ڀڃڪڙي آهي. ترجمان موجب جيڪي شادي هال مالڪ ڪي ڊي اي ۽ ٻين ادارن وٽ ڪمرشلائيزيشن جا چالان جمع نه ڪرائي سگهيا آهن، انهن جا شادي هال سيل ڪيا ويندا، ساڳئي ريت جيڪي شادي هال منظوري ۽ دستاويزن کان محروم آهن، انهن کي ڊاهي پٽ ڪرڻ سميت سخت قانوني ڪارروائي کي منهن ڪرڻو پوندو. ترجمان وڌيڪ چيو ته ٽن ڏينهن جي مقرر مدي کانپوءِ ڪنهن به قسم جي غفلت يا خلاف ورزي تي فوري ايڪشن ورتو ويندو، ٻئي پاسي ڪمرشل ۽ رهائشي پلاٽن تي غير قانوني طور اڏيل شادي هالن ۽ مارڪيز بابت نيب ڪراچي جي حڪم تي ايس بي سي اي سينٽرل ضلعي ۾واقع  230 شادي هالن ۽ مارڪيز جي تفصيلي رپورٽ جمع ڪرائي ڇڏي آهي. رپورٽ م گهڻائي شادي هال ۽ مارڪيز ايس بي سي اي جي منظوري ۽ اين او سي  بنا 200 کان 1200  والن جي پلاٽن تي تعمير ٿيڻ جو انڪشاف ٿيو آهي. غير قانوني اڏاوتن بابت ايس بي سي اي پاران مالڪن کي نوٽيسز جاري ڪيا ويا آهن.واضح رهي ته نيب پاران ڊي جي ايس بي سي اي کي جاري ڪيل ڪال اپ نوٽيس ۾ سرڪاري خزاني کي ٿيندڙ نقصان، اين او سي خلاف ورزين ۽ ذميوار آفيسرن خلاف ٿيل ڪاررواين جي تفصيل طلب ڪيا ويا هئا.