ڪنڌڪوٽ ۾ رياست جي رٽ چيلينج: ٽن ڏينهن اندر وڌيڪ 5 ڄڻا اغوا: مغوين جو انگ 15 ٿي ويو

ڪنڌڪوٽ(رپورٽ: عمران کوسو)ڪنڌڪوٽ ضلعي ۾ ڌاڙيلن رياست جي رٽ چيلينج ڪري ڇڏي، ٽن ڏينهن اندر وڌيڪ 7 ماڻهو اغوا ڪيا وي مغوين جو انگ وڌي 15 ٿي ويو

رپورٽ موجب ڪنڌڪوٽ ضلعو بدامني جي باهه ۾ ٻڙڪي رهيو آهي، ضلعي جي تاريخ ۾ پهريون ڀيرو بدترين بدامني ڦهليل آهي، آڳرين تي ڳڙڻ جيترن ڏوهاري ٽولن پوري ضلعي کي يرغمال بڻائي ورتو آهي

ضلعي اندر رات ته ٺهيو پر صبح ۽ ڏينهن ڏٺي جو ڌاڙيل ٽولا سرعام شهرن توڙي ٻهراڙي وارن علائقن ۾ داخل ٿي ڏوهي وارداتون ڪري رهيا آهن پر انتظاميا توڙي پوليس بي وس بڻجي وئي آهي

هي به پڙهندا

ضلعي مان ڏوهاري ٽولن 36 ڪلاڪن اندر هڪ ماڻهو قتل ڪري 7 ماڻهو اغوا ڪري ورتا آهن جن ۾  4 سالا معصوم نينگر ثمرت ڪمار، ڪنڌڪوٽ گهوٽڪي پل تي تعميراتي ڪم ڪندڙ 3 ملازم جمشيد ملڪ، قِسم، ظفر ، ڪرمپور گرڊ اسٽيشن تان سيپڪو ملازم جميل ۽ آصف آرائين ۽ عبدالرشيد ملڪ شامل آهن

ضلعي مان مجموعي طور انگ 15 مغوي ڌاڙيلن وٽ قيد آهن پر ذريعن جو چوڻ آهي  ته ڪچي ۾ ڏوهاري ٽولن وٽ 35 کان وڌيڪ ماڻهو قيد آهن جن لاءِ ڌاڙيلن مغوين جي وارثن کان ڪروڙين روپيا ڀنگ طلب ڪيو آهي

ضلعي مان 5 مهينن دوران عورتاڻي آواز تي هرکجي اغوا ٿيلن سميت 250 اڍائي سئو مغوي اغوا ۽ بازياب ٿيندا رهيا جڏهن ته اغوا کان بچڻ لاءِ مزاهمت ڪرڻ تي امير بخش ملڪ کي قتل ڪيو ويو، مغوين جي بازيابي عمل ۾ نه اچڻ سبب مغوين جي گهرن ۾ ڪهرام متل آهي

ٻئي طرف مغوي نينگر 4 سالا ثمرت جي گهر ايس ايس پي ڪشمور ڪنڌڪوٽ عرفان سمون کين گهر پهتو ۽ نينگر جي اغوا معاملي تي کين يقين ڏياريو ته نينگر جلد بازياب ٿيندو پر پوليس صرف مغوين جي وارثن کي اهي دلاسا ڏيندي پئي اچي ته مغوي جلد بازياب ٿي ويندا پر ڪڏهن ٿيندا ۽ ڪيئن هن ضلعي مان ڏوهارين جو خاتمو ٿي سگهي ٿو اهو سوال پوليس جي خاطري کان ڳرو ٿي ويو آهي