ڪنڌڪوٽ ۾ سرڪاري اسپتالن ۾ داين کان پوسٽ مارٽم ڪرائڻ جا انڪشاف

ڪنڌڪوٽ(رپورٽ: لياقت کوسو) ڪنڌڪوٽ ۾ سرڪاري اسپتالن اندر عورتن جا پوسٽ مارٽم ضلعي جي هيڊڪواٽر اسپتالن ۾ نه ٿيڻ ۽ ليڊي ڊاڪٽرن بدران  داين هٿان ڪرائڻ جو انڪشاف ٿيو آهي جنهن بعد جاچ ٽيم ڊي ايڇ او آفيس پهچي وئي

تفصيل موجب ڪنڌ ڪوٽ  ضلعي ۾ 37 ليڊي ڊاڪٽرياڻيون مقرر ٿيل آهن پر عورتن جا پوسٽ مارٽم داين کان ڪرايا وڃن ٿا جڏهن ته ڄاڻايل ڊاڪٽرياڻيون ڊيوٽي تي پڻ نه پيون اچن

ضلعي ۾ 37 ڊاڪٽرياڻين مان ڪنهن هڪ جو به ڊيوٽي نه ڪرڻ جون شڪايتون صحت کاتي جي اعليٰ عملدارن کي پيراميڊيڪل اسٽاف اڳواڻن ۽ شهرين طرفان ڪيون ويون جڏهن ته لکت ۾ ليٽر به موڪليا ويا هئا

پيرا ميڊيڪل اسٽاف جي شڪايتن بعد ڊي جي هيلٿ جاچ  ٽيم جوڙي جيڪا  ڊي ايڇ او آفيس پهچي وئي آهي، ڊائريڪٽر صحت لاڙڪاڻو ۽ سکر مان آيل ٽيم ڊاڪٽرياڻين جو رڪارڊ چيڪ ڪيو

ذريعن موجب 37 ڊاڪٽرياڻين مان صرف ڊي ايڇ او آفيس ۾ هن وقت تائين 2 ڊاڪٽرياڻيون ڊي ايڇ او آفيس ۾ جاچ ٽيم آڏو پيش ٿيون

ٻئي طرف پيرا ميڊيڪل اسٽاف اڳواڻ علي حسن قمبراڻي چيو ته اسان جي اسپتال ۾ صرف 2 ڊاڪٽرياڻين کان علاوه ٻيو ڪوبه ڊاڪٽر ڊيوٽي نٿو ڪري، اسان کي اميد آهي ته انڪوائري ٽيم سرڪاري اسپتالن سان انصاف ڪندي