ڪوئيٽا ۾ مڪاني چونڊون 28 ڊسمبر تي ٿينديون: حڪومت جي درخواست رد

اسلام آباد (بيورو رپپورٽ) اليڪشن ڪميشن ڪوئيٽا ۾ بلدياتي چونڊون ملتوي ڪرڻ بابت درخواست رد ڪندي لکت ۾ فيصلو جاري ڪري ڇڏيو آهي. اليڪشن ڪميشن فيصلي ۾ چيو آهي ته سپريم ڪورٽ واضح ڪري چڪي آهي ته بلدياتي چونڊون ڪرائڻ اليڪشن ڪميشن جي ذميواري آهي ۽ ڪو به صوبو يا ادارو ان عمل ۾ رڪاوٽ نٿو وجهي سگهي . مڪاني چونڊون 28 ڊسمبر تي ئي ٿينديون. 2021 ۾ سپريم ڪورٽ جي حڪم جو حوالو ڏيندي فيصلي ۾ چيو ويو آهي ته صوبا اليڪشن ڪميشن جي مدد ڪرڻ جا پابند آهن، رڪاوٽ وجهڻ آئيني خلاف ورزي هوندي. دستاويز مطابق بيليٽ پيپرن جي ڇپائي مڪمل ٿي چڪي آهي، تقريبن سڀ بيليٽ پيپر ڇپجي چڪا آهن، اهڙي صورتحال ۾ چونڊون ملتوي ڪرڻ ممڪن ناهي. اليڪشن ڪميشن صوبائي حڪومت بلوچستان کي هدايت ڪئي آهي ته چونڊن جي پرامن انعقاد لاءِ فول پروف سيڪيورٽي فراهم ڪئي وڃي.