| ڪي پي جي وڏي وزير جو اوچتو يوٽرن: اسٽيبلشمينٽ سان ڳالهين جو اشارو: اختيار ڌڻين سان گڏ ويهي سگهان ٿو: سهيل آفريدي |
اسلام آباد(رپورٽ: ايم بي سومرو) ڪي پي جي وڏي وزير اوچتو يو ٽرن وٺندي اسٽيبلشمينٽ سان ڳالهين جو اشارو ڏئي ڇڏيو. سهيل آفريدي جو چوڻ آهي ته ملڪ جي ترقي لاءِ اختيار ڌڻين سان گڏ ويهي سگهان ٿو. ڪي پي هائوس اسلام آباد ۾ ميڊيا سان ڳالهائيندي وڏي وزير سهيل آفريدي چيو ته بي اختيار ماڻهن سان ڳالهين ڪرڻ جو ڪوبه فائدو ناهي، جن وٽ اختيار آهن جيڪڏهن اهي گهرائيندا ته ملڪ جي ترقي لاءِ انهن سان گڏ ويهڻ لاءِ تيار آهيان. هن چيو ته ملڪ ۾ سمورين پارٽين لاءِ هڪ جهڙو پليئنگ ليول فيلڊ فراهم ڪيو وڃي ته حالتون بهتر ٿي سگهن ٿيون. ڪي پي جي وڏي وزير چيو ته جيڪو به اسان جي جوانن کي شهيد ڪندو آهي اهو دهشتگرد آهي ۽ دهشتگردي جي خاتمي کانسواءِ ڪو آپشن ناهي. پاڪ افغان معاملا ڳالهين ذريعي حل ڪيا وڃن، جيڪڏهن جنگ لازمي ٿي پئي ته ملڪ جو ساٿ ڏيندس هن چيو ته خيبر پختونخواهه جي پوليس مڪمل طور تي اهل آهي ۽ دهشتگردن کي منهن ڏيڻ جي صلاحيت رکي ٿي، پوليس لاءِ جديد اوزارن جي خريداري جي منظوري ڏئي چڪو آهيان. هن چيو وفاق ڀلي اسان جي آڊٽ ڪري جيڪڏهن منهنجو ڀاءُ به ڪرپشن ۾ ملوث نڪري ته ان خلاف ڪارروائي ڪئي وڃي پر اسانکي رهتون ادا ڪري ته پوليس ۽ صحت سميت سڀني شعبن ۾ وڌيڪ بهتري آڻي سگهون ٿا، خيبر پختونخواهه ۾ فرانزڪ ليب قائم ڪئي ويندي. سندس چوڻ هو ته دهشتگردي خيبر پختونخواهه جي هر شعبي کي متاثر ڪيو آهي، جيڪو به اسان جي جوانن کي شهيد ڪندو آهي اهو دهشتگرد آهي، امن خاطر وفاق جو ساٿ ڏيندس، امن امان تي ڪا سوديبازي نه ڪنداسين. سهيل آفريدي چيو ته دهشتگردن کي سزا ڏيڻ لاءِ صوبائي سطح تي قانون سازي جي هدايت ڪري ڇڏي آهي.هن چيو ته مون ڪنهن کي به ڌمڪي نه ڏني آهي چاهيون ٿا ته نه اسان جي حق ۾ ۽ نه ئي اسان جي مخالفت ۾ ڌانڌلي ٿئي. هن چيو عمران سان ملاقات لاءِ هر قانوني رستو اختيار ڪيو پر ملاقات ڪرڻ نه ڏني وئي آهي هاڻ عوام رستن تي نڪرڻ لاءِ تيار آهي پر ان جو فيصلو به عمران خان ڪندو. هن آءِ ايس پي آر جي ان بيان ته ڪي پي ۾ دهشتگردي ۽ منشيات جي اسمگلنگ کي سياسي پٺڀرائي حاصل آهي جي جواب ۾ چيو ته پوءِ بلوچستان ۽ ٻين علائقن ۾ جيڪا منشيات جي اسمگلنگ ٿيندي آهي ان جا ذميوار به اسان آهيون؟ هن چيو ته ٽي ٽي پي هڪ ناسور آهي جنهن جو خاتمو ضروري آهي پر حڪمت عملي جوڙيندڙن ڪي پي حڪومت کي به اعتماد ۾ ورتو وڃي. هن چيو ته 4 ڊسمبر تي ٿيندڙ اين ايف سي اجلاس ۾ شرڪت ڪندس ۽ پنهنجي صوبي جو ڪيس پيش ڪندس. صوبي کي 400 ارب رپيا نه ڏنا ويا آهن.