| ڪي پي جي وڏي وزير کي سنڌ اچڻ تي ڀليڪارچونداسين: شرجيل |
ڪراچي (اسٽاف رپورٽر) سنڌ جي سينيئر وزير شرجيل انعام ميمڻ ڪي پي جي وڏي وزير سهيل آفريدي کي سنڌ اچڻ تي ڀليڪار ڪندي چيو آهي ته سهيل آفريدي کي وڏي وزير جو پروٽوڪول ڏينداسين، کيس سنڌ ۾ مڪمل آزادي هوندي، جتي به سرگرميون هونديون، سيڪيورٽي فراهم ڪنداسين، پي ٽي آءِ جي حڪومت هئي ته نواز ليگ جي قيادت جي به آجيان ڪئي هئي، اڄ نواز ليگ جي حڪومت آهي، پي ٽي آءِ سان لاڳاپيل وڏي وزير سهيل آفريدي کي ويلڪم ڪنداسين، عمران خان جي حڪومتي دور۾ دھشتگردن جي آزادي جھڙن معاملن تي شديد اعتراض آھن . ڪراچي پريس ڪلب ۾ نون چونڊيل عهديدارن کي مبارڪون ڏيندي هن چيو ته صحافت تيزي سان جديد رخ اختيار ڪري رهي آهي،هاڻي اها رڳو پرنٽ يا اليڪٽرانڪ ميڊيا تائين محدود ناهي رهي. سنڌ حڪومت صحافين کي جديد مهارتن سان ليس ڪرڻ لاءِ هر ممڪن سهڪار ڪندي. هن ٻڌايو ته سنڌ حڪومت صحت، ٽرانسپورٽ ۽ صحافين جي ڀلائي لاءِ تاريخي قدم کنيا آهن، هن چيو ته صحافت جي آزادي ۽ صحافين جي حقن جو تحفظ حڪومت جي ترجيح آهي، هن چيو ته ملڪي تاريخ گواھ آھي تھ جمھوريت جي جدوجھد ۾ پيپلز پارٽي ۽ صحافي سدائين گڏ گڏ رھيا آھن، هن چيو ته جيڪي عورت صحافي ڊرائيونگ لائسنس جمع ڪرائينديون اُنھن کي ٽريننگ ڏيڻ بعد ڏھن ڏينھن اندر مفت اسڪوٽيز ڏنيون وينديون. هڪ سوال جي جواب ۾ ھن چيو تھ سمورين سياسي پارٽين کي سياسي سرگرمين جو حق آھي، سنڌ حڪومت ڪنھن کي به نه روڪيندي، باقي ڏڦيڙ، نفرت انگيزي ۽ قانون ٽوڙڻ جي اجازت نٿي ڏئي سگھجي.