| ڪي پي ۾ دهشتگردن جا ٻه حملا، 9 ڄڻا مارجي ويا |
ٽانڪ/اورڪزئي(م ڊ) ڪي پي ۾ حملي ۾ 9 ڄڻا مارجي ويا. ڪالهه اورڪزئي جي علائقي يخ گنڊائو ۾ امن لشڪر تي دهشتگردن طرفان حملو ڪيو ويو. ايس ڊي پي او محبوب خان تصديق ڪئي ته امن لشڪر تي حملي ۾ ٻه ڄڻا مارجي ويا ۽ 3 زخمي ٿي پيا. هن ٻڌايو ته امن لشڪر جي جوابي ڪارروائي ۾ 3 دهشتگرد ماريا ويا آهن. ٻئي طرف ضلعي ٽانڪ ۾ گومل بازار ٿاڻي جي بڪتربند گاڏي ڀرسان ريموٽ ڪنٽرول بم ڌماڪي ۾ 6 پوليس اهلڪارن سميت 7 ڄڻا شهيد ٿي ويا. پوليس موجب بڪتربند گاڏي گومل ٿاڻي کان ٽانڪ اچي رهي هئي ته گومل بازار روڊ تي ريموٽ ڪنٽرول ڌماڪي جو نشانو بڻي. پوليس ٻڌايو ته ڌماڪي جي نتيجي ۾ بڪتربند گاڏي تباهه ٿي وئي ۽ 6 پوليس اهلڪار شهيد ٿي ويا، جن ۾ گومل ٿاڻي جو ايڊيشنل ايس ايچ او اسحاق خان به شامل آهي. پوليس موجب شهيدن ۾ هڪ واٽهڙو به شامل آهي.