| ڪي پي ۾ گورنر راڄ لڳائي ڏسن حڪمرانن کي حيثيت جي خبر پئجي ويندي، ماڻهو روڊن تي ايندا: پي ٽي آءِ |
پشاور(م ڊ) پي ٽي آءِ ۽ ڪي پي حڪومت چيو آهي ته ڪي پي ۾ ڀلي گورنر راڄ لڳائين کين اصل حيثيت جي خبر پئجي ويندي، نوجوان وزيراعليٰ کي الزام هڻي ۽ گورنر راڄ جون ڌمڪيون ڏئي ڊيڄارڻ جي ڪوشش ڪئي پئي وڃي. نجي ٽي وي سان ڳالهائيندي پي ٽي آءِ جي اطلاعات سيڪريٽري شيخ وقاص اڪرم چيو ته ڪي پي ۾ گورنر راڄ لڳائڻ جي ڌمڪي ڪا نئين ڳالهه نه آهي، علي امين گنڊاپور جي دور ۾ به هي اهوئي چوندا هئا، پر هنن کي ناڪامي نصيب ٿي هي سلسلو گهڻي وقت کان هلي رهيو آهي، ڪنهن ايجنڊا تحت اهي ڳالهيون ڪيون پيون وڃن، عمران چئي چڪو آهي ته ڀلي حڪومت وڃي کيس ڪا پرواهه نه آهي. هن چيو ته هي نوجوان وڏي وزير کي ڊيڄارڻ چاهين ٿا. هن چيو ته عليمه خان جي ڳالهه هڪ ڀيڻ جا ڀاءُ لاءِ جذبات آهن هوءَ گهريلو عورت آهي نواز شريف سياسي اڳواڻ طور ڀارت جي چينلن کي انٽرويو ڏنا ٻئي هڪ جهڙا نه آهن. ٻئي طرف ڪي پي جي اطلاعات واري صلاحڪار ميڊيا سان ڳالهائيندي چيو ته هي ڀلي گورنر راڄ ڪي پي ۾ لڳائي ڏسن هنن کي خبر پئجي ويندي. هن چيو ته گورنر راڄ لڳو ته ڪي پي ۾ احتجاج ٿيندو ۽ ان ۾ ايترا ماڻهو شامل ٿيندا جو هنن کي پنهنجي حيثيت جي خبر پئجي ويندي.