| گوادر کي مين ريلوي لائين سان ڳنڍڻ جي تياري: فزيبلٽي مڪمل: سينيٽ ڪميٽي سوال اٿاري ڇڏيا |
اسلام آباد (بيورو رپورٽ) گوادر کي مين ريلوي لائين سان ڳنڍڻ جي تياري، فزيبلٽي مڪمل. سينيٽ اسٽيڊنگ ڪميٽي ۾ ايم ايل ون، ريلوي خساري، ڪرپشن ۽ اراضي معاملن تي سخت سوال اُٿاري ڇڏيا. سينيٽ جي ريلوي بابت اسٽيڊنگ ڪميٽيءَ جو اجلاس چيئرمين ڄام سيف الله ڌاريجو جي صدارت هيٺ پارليامينٽ هائوس ۾ منعقد ٿيو، جنهن ۾ گوادر کي مين ريلوي لائين ۽ ڪوئيٽا سان ڳنڍڻ واري منصوبي سميت پاڪستان ريلوي جي مختلف ترقياتي، انتظامي ۽ مالي معاملن تي تفصيلي غور ڪيو ويو. اجلاس کي آگاهه ڪيو ويو ته گوادر ريلوي ڪنيڪٽيوٽي منصوبي جي فزيبلٽي مڪمل ٿي چڪي آهي، جنهن جو جائزو هڪ بين الاقوامي فرم ذريعي ورتو ويو آهي. منصوبي جي منظوري لاءِ ريلوي بورڊ ۾ پيش ڪرڻ جي تياري جاري آهي، فنڊنگ لاءِ حڪومتي وسيلن سان گڏ مائننگ ڪمپنين جي شراڪت تي به غور ڪيو پيو وڃي. لاڳاپيل اختيارين مطابق بلوچستان جي معدنيات سان ڀرپور علائقن کي سڌو گوادر سان ڳنڍڻ سان معدني برآمدات ۾ نمايان اضافو ٿيندو. اجلاس دوران سينيٽر روبينا خالد ڏيڍ سال اڳ حل ٿيل معاملن جي ٻيهر بحث هيٺ اچڻ تي سخت ڪاوڙ جو اظهار ڪندي مختلف وزارتن وچ ۾ رابطي جي کوٽ کي وقت ۽ وسيلن جو زيان قرار ڏنو. سينيٽر ناصر بٽ ۽ وفاقي وزير ريلويز وچ ۾ ٽينڊر ملتوي واري معاملي تي به منهن ماري ٿي. ناصر بٽ شفافيت ۽ ذميوارن جي نشاندهي جو مطالبو ڪيو، جڏهن ته ريلوي واري وزير ڪنهن به ذاتي نوازش جي ترديد ڪندي چيو ته ٽينڊر بي ضابطگين جي بنياد تي منسوخ ڪيو ويو. ڪميٽي ۾ ريلوي ايراضي تي غيرقانوني قبضن، سپريم ڪورٽ جي حڪمن تي عملدرآمد نه ٿيڻ ۽ اربين رپين جي ماليت واري زمين خالي نه ڪرائڻ تي سخت ڳڻتي جو اظهار ڪيو ويو. ڪميٽي سفارش ڪئي ته ريلوي ايراضي جو ٽائيٽل ڪليئر ڪري شفاف نيلامي ذريعي ڏنو وڃي.