| گيس جي لوڊشيڊنگ ڇو؟ سنڌ اسيمبلي مان ٺهراءُ منظور : سرڪار پاران حمايت |
ڪراچي(اسٽاف رپورٽر) سنڌ اسيمبلي ۾ پرائيويٽ ميمبر ڏهاڙي تي سنڌ مان گيس جي لوڊشيڊنگ / کوٽ ختم ڪرڻ سميت مخالف ڌر جي ميمبرن جا ڪيترائي ٺهراءَ منظور ڪيا ويا، اسپيڪر جماعت اسلامي جي محمد فاروق جو ڪراچي ۾ اي-چالان بابت پيش ڪيل ٺهراءُ “معاملو عدالت ۾ ٻڌڻي هيٺ هجڻ” جو عذر ڏئي رد ڪري ڇڏيو، ڪالهه ايم ڪيو ايم جي ميمبر عامر صديقي ڪراچي ۾ گيس جي لوڊشيڊنگ خلاف پرائيويٽ ٺهراءُ پيش ڪيو، جنهن جي حڪومت پاران به حمايت ڪئي وئي، اهو ٺهراءَ ترميم سان منظور ڪيو ويو ته ڪراچي بدران سڄي سنڌ ۾ گيس جي کوٽ ختم ڪئي وڃي. قرارداد پيش ڪندي عامر صديقي چيو ته ڪراچي شهر ۾ گيس ناهي، سنڌ جي وڏي وزير کي اهو معاملو سي سي آءِ ۾ اٿارڻ گهرجي. هن چيو ته سوئي گئس ڪمپني ڪراچي شهر ۾ روڊ ڪٽنگ جا 14 ارب ڏنا آهن، پر اڃا تائين کوٽيل روڊ نه ٺهي سگهيا آهن. ان موقعي تي سينيئر وزير شرجيل انعام ميمڻ چيو ته اسان عامر صديقي جي قرارداد جي مخالفت نٿا ڪري سگهون،گيس جو بحران سڄي سنڌ جو اهم مسئلو آهي. پيپلز پارٽي جي غلام قادر چانڊيو چيو ته قرارداد ۾ ڪراچي بدران سڄي سنڌ لکڻ گهرجي ڇو ته سڄي سنڌ ۾ گئس جي کوٽ آهي. ايم ڪيو ايم جي راشد خان چيو ته سنڌ 70 سيڪڙو گيس فراهم ڪري ٿي. ٽنڊو عالم گيس فيلڊ هوندي حيدرآباد ۾ به گيس جي کوٽ آهي، پ پ جي جميل سومرو چيو ته گئس جو مسئلو سڄي سنڌ جو آهي، آئين ۾ چيو ويو آهي ته صوبي جا وسيلا پهريائين صوبو استعمال ڪندو پر گئس جي معاملي ۾ سنڌ سان ناانصافي ٿي رهي آهي. پي ٽي آءِ جي شبير قريشي چيو ته سي اين جي پمپ بند ڪري سڄي سنڌ ۾ گئس جي فراهمي يقيني بڻائي وڃي. ايم ڪيو ايم جي صابر قائمخاني چيو ته پاڪستان جو آئين اسان کي صوبي جي حقن جي حفاظت جي اجازت ڏئي ٿو. سنڌ کي پنهنجي صوبي جي گيس فراهم ڪرڻ گهرجي. صوبائي وزير ڄام خان شورو چيو ته سنڌ 2000 ايم ايم سي ايف ٽي گيس پيدا ڪري ٿي، موٽ ۾ سنڌ کي ڪڏهن ڪڏهن 900 ايم ايم سي ايف ٽي گيس فراهم ڪئي ويندي آهي. ايوان گئس جي کوٽ خلاف ٺهراءُ منظور ڪري ورتو. ايوان ۾ جماعت اسلامي جي ميمبر فاروق احمد ڪراچي ۾ اي-چالان بابت قرارداد پيش ڪئي، جنهن جي حڪومت مخالفت ڪئي، بعد ۾ اسپيڪر فيصلو ڏنو ته معاملو هن وقت عدالت ۾ ٻڌڻي هيٺ آهي، ان ڪري ايوان ۾ بحث ڪري نٿو سگهجي. اسپيڪر قرارداد کي غير آئيني قرار ڏيندي رد ڪري ڇڏيو. سنڌ اسيمبلي جو اجلاس جمعي تي صبح 10 وڳي تائين ملتوي ڪيو ويو.