ڪراچي(رپورٽ: شاهد ميراڻي) سنڌ اسيمبلي جي ميمبرن پاران ايوان ۾ مڪاني ادارن بابت پڇيل سوالن جي جوابن لاءِ سنڌ اسيمبلي اختيارين جو مڪاني کاتي جي سيڪريٽري کي خط، سال 2022ع کان 2025ع تائين استعمال ٿيل مجموعي بجيٽ، گذريل هڪ سال ۾ غيرترقياتي خرچن جي تفصيلن سميت حيدرآباد جي انفراسٽرڪچر کي بهتري بڻائڻ لاءِ کنيل قدمن سميت مختلف معاملن جا تفصيل طلب، 10 ڏينهن اندر تفصيل جمع نه ڪرائڻ جي صورت ۾ مڪاني کاتي جي سيڪريٽري خلاف معاملو اسيمبلي ۾ اٿارڻ جو چتاءُ ان حوالي سان مليل ڄاڻ موجب سنڌ اسيمبلي جي مختلف ميمبرن اسيمبلي سيڪريٽريٽ ۾ مڪاني کاتي بابت جمع ڪرايل سوالن جي جوابن لاءِ سنڌ اسيمبلي جي اختيارين مڪاني کاتي جي سيڪريٽري کي خط لکي تفصيل گھرائي ورتا آهن، خط ۾ چيو ويو آهي ته اسيمبلي ميمبرن سوال جمع ڪرايا آهن ته مڪاني کاتي جي پهرين جنوري 2022ع کان 2025ع تائين استعمال ٿيل بجيٽ جا تفصيل فراهم ڪيا وڃن، حيدرآباد جي انفراسٽرڪچر کي بهتر بڻائڻ لاءِ کنيل قدمن جا ٽن سالن جا تفصيل فراهم ڪيا وڃن، سال 2024ع کان 2025ع تائين غير ترقياتي خرچن جا به تفصيل فراهم ڪيا وڃن. خط ۾ چيو ويو آهي ته ڄاڻايل تفصيل 10 ڏينهن اندر فراهم نه ڪيا ويا ته معاملو سنڌ اسيمبلي ۾ اٿاريو ويندو.