27هين ترميم خطرناڪ آهي، مخالف ڌر مڪمل رد ڪري: حافظ نعيم

لاهور(م ڊ) جماعت اسلامي پاڪستان جي امير حافظ نعيم الرحمان صدر پاڪستان لاءِ تاحيات ڇوٽ کي غلط ۽ شرمناڪ قرار ڏئي ڇڏيو آهي. سماجي رابطن واري ويب سائيٽ ايڪس تي جماعت اسلامي جي امير حافظ نعيم الرحمان لکيو آهي ته پاڪستان جي صدر لاءِ تاحيات ڇوٽ مذهبي، آئيني، جمهوري، سماجي ۽ سياسي لحاظ کان غلط ۽ شرمناڪ آهي ۽ اهو عمل انصاف جي نظام کي مارڻ جي برابر آهي، پي ڊي ايم ۽ پي پي جي جمهوريت ڪهڙا رنگ ڏيکاريندي، مرضي، وراثت ۽ شاهي لقب تي پارٽي هلائڻ کان وٺي پارليامينٽ جي ميمبرن کي خريد ڪرڻ ۽ وڪڻڻ، ميئر شپ تي قبضو ڪرڻ ۽ فارم 47 ذريعي سياست کي اڳتي وڌائڻ  کان پوءِ هاڻي عوام عدالتن جي آڏو به جوابده نه ٿا ٿيڻ چاهين. جماعت اسلامي جي امير وڌيڪ چيو ته 27 هين ترميم جا جيڪي تفصيل سامهون اچي رهيا آهن اهي خوفناڪ آهن، مخالف ڌر کي ان کي مڪمل طور تي رد ڪرڻ گهرجي.