آمريڪا ۾ وڏي سياسي تبديلي، ٽرمپ جون ڌمڪيون رد: ظهران ممداني نيويارڪ جو پهريون مسلمان ميئر، 2 رياستن ۾ به ڊيموڪريٽ ڪامياب

نيويارڪ(م ڊ) آمريڪي شهر نيو يارڪ جي عوام صدر ٽرمپ جون سموريون ڌمڪيون ۽ نفرت تي ٻڌل چونڊ مهم رد ڪندي ميئر جي چونڊن ۾ ڊيموڪريٽڪ سوشلسٽ مسلمان اميدوار ظهران ممداني کي ڪامياب ڪري ڇڏيو. جڏهن ته ٽرمپ جي ريپبلڪن پارٽي ٽن اهم رياستن جي گورنري ۽ نائب گورنري به وڃائي ويٺي آهي. مليل اطلاعن موجب آمريڪا ۾ ٿيل ميئر ۽ رياستي گورنرن جي چونڊ ۾ تاريخ تبديل ٿي وئي آهي. نيويارڪ جي تاريخ ۾ پهريون ڀيرو ڪنهن مسلمان اميدوار کي ميئر چونڊيو ويو آهي. چونڊن جي غير سرڪاري نتيجن موجب ظهران ممداني 50.3 سيڪڙو (10 لک 24 هزار 794) ووٽ کڻي ڪامياب ٿي ويو آهي، جڏهن ته سندس مخالف نيو يارڪ جي اڳوڻي گورنر اينڊريو ڪوومو 8 لک 47 هزار 200 (41.6) سيڪڙو ووٽ حاصل ڪيا. نيويارڪ جي ميئر جا نتيجا اچڻ تي هزارين ماڻهو جشن ملهائيندا رستن تي نڪري آيا ۽ نچندا رهيا. آمريڪا ۾ رياستي چونڊن لاءِ ووٽنگ پڻ ٿي، ورجينيا ۽ نيو جرسي رياستن ۾ ڊيموڪريٽس اميدوار کٽي ويا. ورجينيا رياست ۾ گورنر ۽ ليفٽيننٽ گورنر لاءِ ووٽنگ ٿي نتيجن موجب ڊيموڪريٽس تاريخي فتح حاصل ڪئي. ڊيموڪريٽڪ اميدوار ابيگيل اسپنبرگر ورجينيا جي پهرين عورت گورنر چونڊجي وئي. ورجينيا ۾ ئي، ڊيموڪريٽڪ پارٽي جي اميدوار غزالا هاشمي کي وائيس گورنر چونڊيو ويو آهي. غزالا هاشمي پهرين هندستاني نسل ۽ مسلمان وائيس گورنر آهي. چونڊ نتيجن ۾، غزالا هاشمي کي 1,272,699 ووٽ جڏهن ته سندس مخالف جان ريڊ کي 1,043,090 ووٽ مليا. آمريڪا ۾ ڊيموڪريٽس جي انهن مسلسل ڪاميابين کي مڊٽرم چونڊن کان اڳ پارٽي لاءِ وڏي ڪاميابي قرار ڏنو پيو وڃي. ڊيموڪريٽڪ اميدوار ‘مڪي شيرل’ نيو جرسي ۾ گورنر شپ جي اليڪشن ۾ ڪاميابي حاصل ڪئي. مڪي شيرل جو مقابلو ريپبلڪن حریف ۽ اڳوڻي رياستي اسيمبلي ميمبر جڪ چيٽرلي سان هو. لاهور ڄائو مصعب علي نيو جرسي جي جرسي سٽي جي ميئر لاءِ ميدان تي لٿل آهي. اينڊري ڊڪنز اٽلانٽا جي ميئر جي چونڊ ۾ ٻئي دور لاءِ ميئر چونڊيو ويو آهي. ظهران ممداني ڪاميابي کانپوءِ پهرئين خطاب ۾ ان عزم جو اظهار ڪيو ته هو نيو يارڪ کي هڪ اهڙو شهر بڻائيندو، جتي هر هڪ جي آجيان ڪئي وڃي، نيو يارڪ ۾ هاڻ اسلامو فوبيا جي ڪا گنجائش ناهي. هن چيو ته اڄ خوف جي شڪست ۽ اميد جي فتح ٿي آهي، نيو يارڪ ۾ موروثي سياست جو خاتمو ٿي ويو آهي، هي شهر توهان جو آهي، جمهوريت به توهان جي آهي ۽ مستقبل توهان جي هٿن ۾ آهي. آمريڪي صدر کي مخاطب ٿيندي ظهران ممداني چيو ته مون کي خبر آهي توهان ڏسي رهيا آهيو ٻڌي وٺو نيويارڪ پناهگيرن جو شهر آهي ۽ رهندو. نيويارڪ جي هر مزدور جو ٿورو ادا ڪريان ٿو. ٽيڪسي ڊرائيورز، شيفر ۽ نرسز جو به ٿورو. نيويارڪ کي اهڙو ٺاهينداسين جتي ورڪنگ ڪلاس آساني سان رهي سگهجي. ظهران ممداني چيو ته اسان سان جيڪو ڪجهه ٿيو اهو سياست نه، سياست هاڻ ٿيندي، عوام کي ورهائڻ جي اجازت نه ڏينداسين، نيويارڪ ۾ اسلاموفوبيا جي ڪابه گنجائش نه آهي، ڪو ٽرمپ کي شڪست ڏئي سگهي ٿو ته اهو نيويارڪ شهر آهي. پهرين جنوري کان اسان هڪ اهڙي شهري حڪومت ٺاهينداسين جيڪا سڀني لاءِ فائديمند هوندي. ٽرمپ جهڙن اميرن کي فائدو ڏيندڙ ٽيڪس نظام ختم ڪيو ويندو هاڻ اميرن کان ٽيڪس اوڳاڙيو ويندو.