تازا ترين
  • *مبارڪپور ۽ ڀرپاسي ۾ عطائي ڊاڪٽرن خلاف ڪارروائيون، 4ڪلينڪون سيل *صحت کاتي جي ٽيم ارشاد سرڪي جي اڳواڻي ڪارروائي ڪندي4 ڪلينڪون سيل ڪري ڇڏيون *عطائي ڊاڪٽر انسانين جانين سان کيڏي رهيا آهن، کين بخش نه ڪيو ويندو: فوڪل پرسن*
  • *سکر ۾ موبائل جي دڪان مان چوري جي الزام هيٺ 3 ٻارڙا سوگها، پوليس حوالي *2ٻارڙيون ھينڊ فري خريد ڪرڻ آيون، ٻاهر نڪتس ته نينگر رقم کڻي فرار ٿي ويو: دڪاندار *سکر: دڪاندارن پاران پڪڙڻ تي ٻارڙا هٿ ٻڌي روئيندا رهيا *سي سي ٽي وي فوٽيج ڏسڻ بعد ٽن ٻارڙن کي پڪڙي پوليس حوالي ڪري ڇڏيو: دڪاندار*

انساني مسيحا ۽ سماجي رويا

هن وقت جڏهن ڪورونا جهڙي عالمي وبا دنيا جي ڪيترن ئي ملڪن جي ماڻهن کي وڪوڙي چڪي آهي، لکين انساني جانيون ڳڙڪائيندڙ هن وبا سڄي دنيا ۾ معيشت کي ڪمزور ڪري ڇڏيو آهي، هونئن به هڻ وٺ واري سماج ۾ هاڻي انسانيت ۽ اخلاقيات رڳو ڪتابي ڳالهيون لڳن ٿيون، عملي طور انهن جو مظاهرو ڪندي شايد ئي ڪو ماڻهو نظر ايندو هوندو ۽ پوءِ اهڙو ڪو انسان ملي وڃي ته پوءِ يقينن اھو انساني مسيحا ئي ٿي سگھي ٿو.
جھڙي ريت ، ذاتي ڪردار جو تعلق پيشي سان ڳنڍيل ناهي هوندو، ائين ئي استاد والدين طور ليکيا وڃن ٿا پر پرائمري اسڪولن کان وٺي يونيورسٽين تائين استادن جي روپ ۾ ڪيترائي اهڙا وحشي به موجود آهن، جيڪي اولاد جي حيثيت رکندڙ پنهنجي معصوم شاگردن توڙي شاگردياڻين کي پنهنجي حوس جو نشانو بڻائين ٿا. سندن ان قسم جي عمل جو مطلب اهو ناهي ته سمورا استاد خراب آهن، ساڳي ريت سرڪاري تو ڙي خانگي اسپتالن ۾ مختلف بيمارين ۾ وڪوڙيل ماڻهن جو علاج ڪندڙ مسيحائن ۾ يقينن سڀئي فرشتا صفت نه هوندا پر سڀئي مسيحا به ڪاروباري سوچ جا نه هوندا ۽ انهن جي لاءِ مريض گراهڪ نه پر مريض ئي هوندو. اهي مرض جي خاتمي لاءِ نيڪ نيتي سان به ڪم ڪندا هوندا، پر اسان وٽ جيڪڏهن ڪو اسپتال ۾ مريض مري وڃي ٿو ته انهي تي فوتي جي وارثن جو نه رڳو رويو منفي هجي ٿو پر اهي ته ڊاڪٽرن تي تشدد ڪري، جاني دشمن بڻجيو وڃن ٿا، جڏهن ته ڪو به ڊاڪٽر پنهنجي وس آهر اهو نه چاهيندو ته مريض سندس آڏو مري وڃي پر هو حياتي بچائڻ جي ڪوشش نه ڪري اهو ناممڪن آهي، ڪردار ۾ ٿي سگهي ٿو ته ڪي ڊاڪٽر لالچي هجن يا بدڪردار هجن پر انهي جو اهو مطلب ناهي ته سمورن ڊاڪٽرن تي آڱريون کنيون وڃن ۽ سندن ڪردارڪشي ڪجي، اهڙي عمل سان اسين پنهنجي مسيحائن جو وڏو انگ وڃائي ويهنداسين، انهي ڪري سماجي روين جي تبديلي وقت جي انتهائي اهم ضرورت آهي، خاص طور هن وقت جڏهن ڪنهن به ڪورونا متاثر کي سندس گهر وارا پنهنجي ڀر ۾ به نٿا ويهارين، هڪڙي الڳ ڪمري ۾ آئيسوليٽ ڪن ٿا تڏهن انهن ئي مريضن جو ڊاڪٽر، نرسنگ اسٽاف يا پيرا ميڊيڪل اسٽاف وارا علاج ڪن ٿا، سندن سار لهن ٿا،جيتوڻيڪ انهي جي عيوض کين سرڪار يا خانگي اسپتال اهو معاوضو ادا ڪري ٿي، پر انهن جي خدمت انهي معاوضي کان الاهي وڏو جذبو آهي، انهن مسيحائن تي هن وقت سوشل ميڊيا توڙي عام زندگي ۾ ملندڙ ماڻهن جي واتان تهمتون ٻڌي ڏک ٿئي ٿو.
اسانکي ڪيترائي ماڻهو ملن ٿا جيڪي ڪورونا کي مرض طور اڃا تائين تسليم ئي نٿا ڪن ته اهي احتياطي تدبيرو ڪٿي ٿا ڪن. وري جيڪي ڪورونا کي وائرس طور خطرناڪ سمجهن ٿا اهي چون ٿا ته اسپتالن ۾ ڪورونا ۾ مبتلا ماڻهن کي هٿن سان ماريو ٿو وڃي، هاڻي ان قسم جي سوچ تي نه رڳو افسوس ڪري سگهجي ٿو پر اهڙي سوچ خلاف مزاحمت ڪرڻ ۽ پنهنجي ماڻهن کي درست دڳ تي وٺي هلڻ لاءِ حڪمت عملي جوڙڻ جي ضرورت آهي، ته ساڳي وقت انهن مسيحائن کي به اهو احساس ڏيارڻ جي ضرورت آهي ته اهي ئي اسانجو سرمايو آهن، کين سلام پيش ڪرڻ سان گڏ سندن سلامتي جا ذميوار به اسين ئي آهيون ۽ اسين انهن جي حفاظت لاءِ هٿيار کڻڻ کانسواءِ ئي ميدان۾ لهنداسين ۽ اهو شعور اجاگر ڪنداسين ته هي مسيحا مرض سان وڙهي مريض کي بچائين ٿا، انهن مسيحائن سان ئي صحتمند سماج جڙيل آهي.
اسان وٽ نه رڳو ايس آءِ يو ٽي جو بنياد رکندڙ ڊاڪٽر اديب رضوي، اين آءِ سي وي ڊي جو بنياد رکندڙ ڊاڪٽر نديم قمر شاهه ۽ گمبٽ ۾ جگر جي پيوندڪاري جو انسٽيٽيوٽ قائم ڪندڙ ڊاڪٽر رحيم بخش ڀٽي ۽ محمد خان ٻٻر جهڙا ڪردار آهن، پر اسان وٽ ڪيترائي ٻيا اهڙا ڊاڪٽر به آهن، جيڪي ڪنهن ٽي وي چينل جي ڪيمرا کان پري پنهنجو ڪم ڪن ٿا، جيتوڻيڪ مٿي ڄاڻايل مسيحا به اسان جي سنڌ جي ٻهراڙين مان سرڪاري اسڪولن مان پڙهي ۽ پوءِ اڄ دنيا ۾ سنڌ سميت پوري ملڪ جي سڃاڻپ بڻيا آهن، جنھن تي سڄي سنڌ جيترو به ناز ڪري اھو گھٽ آھي ڇو ته ھنن سنڌ کي نه صرف پنھنجي ڌرتي ماءُ ڪري ڄاتو پر ماروئڙن جا سور سھي بھادر سپوت ھئڻ جو ثبوت ڏنو آھي.
هن وقت سنڌ ۾ ڪورونا جي خلاف جهاد واري جنگ ۾ جيڪي به هن ڌرتي جا سپوت مسيحا ميدان ۾ لٿل آهن، اچو ته انهن جو احساس ڪريون ۽ سلام پيش ڪرڻ سان گڏ سندن قدر ڪريون، ڪنهن هڪ ڊاڪٽر جي شڪايت کي جواز بڻائي هن مسيحائي پيشي جي مالڪن جي حوصلا شڪني جو سبب نه بڻجون ۽ پنهنجي ميسحائن جي مالڪي ڪريون، جيڪي انسان ذات جي خدمت کي ئي پنهنجو دين ۽ ڌرم سمجهندا آهن، انهن لاءِ ئي شاهه صاحب چيو آهي ته:
روزا نــــمـــــازون پـــــڻ چـــڱا ڪـم،
اهو ٻيو فهم، جنهن سان پسين پرين کي.

Bookmark the permalink.

Leave a Reply

Your email address will not be published. Required fields are marked *