تازا ترين
  • *صدرجي ڀٽيون ويجهو جوابدارگهٽي مان گذرڻ تان نينگر کي ڪهاڙيون هڻي زخمي ڪري ڇڏيو *ڳوٺ حيات اڄڻ واسي زخمي شڪيل پٽ شمن اڄڻ کي پير جو ڳوٺ اسپتال منتقل ڪيو ويو *ڪٽار اڄڻ، بشير اڄڻ، مومن اڄڻ ۽ ٻين شڪيل تي بيگناهه ڪهاڙين سان حملو ڪيو: وارث*
  • *اسلام آباد هاءِ ڪورٽ ۾ ايف ايٽ ڪچهري حملو ڪيس *دهشتگردي ٽوڙ عدالت مان ڪيس ٻي عدالت منتقل ڪرڻ بابت درخواست تي لکت ۾ حڪم نامو جاري *چيف جسٽس اسلام آباد هاءِ ڪورٽ اطهر من الله حڪم نامو لکيو *دهشتگردي جي خاتمي واري قانون 1997تحت ٻئي عدالت کي اختيار ڏئي سگهجن ٿا: حڪم نامو* عدالت ڊپٽي جنرل کي 7ڊسمبر تائين آگاهه ڪرڻ جي هدايت ڪري ڇڏي*
  • *حيدرآباد جي سول اسپتال ۾ ڪورونا وگهي 2 عورتون فوت *ڪوٽڙي واسڻ مسمات عائشه ۽ مٽياري واسڻ مسمات امير زادي جا مڙهه وارثن حوالي ڪيا ويا*
  • *ھمايون شريف ويجهو موٽرسائيڪل ۽ رڪشا ۾ ٽڪر، پيرسن فوت، هڪ ڄڻو زخمي ٿي پيو *قومي شاهراهه تي حادثي ۾ ڳوٺ محراب بکراڻي واسي 50 ورهين جو عبدالجبار بکراڻي فوت ٿي ويو *حادثي ۾ شڪارپور واسي غلام حسين ڀٽو زخمي ٿي پيو، اسپتال منتقل*
  • *ڀٽ شاهه ۾ نامعلوم هٿياربندن جو گهر تي حملو، فائرنگ ۾ نوجوان مارجي ويو،سندس امڙ زخمي *هٿياربندن جي حملي ۾ نوجوان سليم مارجي ويو،سندس امڙ منل خاتون زخمي ٿي پئي *مقتول نوجوان جو لاش ۽ زخمي عورت کي اسپتال منتقل ڪيو ويو*

جهالت الائي ڪڏهن جند ڇڏيندي؟

سياسي خبرن اسان جا ڌيان سيڙائي رکيا آهن، جڏهن ته سنڌ کي سئو سور پلئه آهن. قبيلائي جهالت خلق جو جيئڻ حرام ڪري ڇڏيو آهي. گهوٽڪي جي پاسي ڏي رشتي جي ڳالهه تي ٻه قبيلا تکا مٺا ٿي رهيا آهن. ٻه راڄ اٽڪي رهيا آهن. پيري ۽ سرداري پنهنجي طاقت سان آمهون سامهون ٿيون آهن. ڪٺ جي مقابلي ۾ ڪٺ پيا ٿين، ڳالهه ڌمڪين تي پهتل آهي. دڳ جهيڙي جا کليل آهن، ڪنهن مهل به خونريزي ٿي سگهي ٿي. رشتي جي ڳالهه تان ٻه راڄ آٽيا آهن. هڪ قبائلي طاقت وارا ٻيو پيري مريدي وارا ننگن جي نانءَ تي وڙهسان وڙهسان ويٺا ڪن، حڪومت الائي ڪٿي آ….
هڪ قبيلي جي پيراڻي گهراڻي ۾ ٻئي قبيلي جي سرداري گهراڻي جي نياڻي پرڻي آهي. مائٽن انهيءَ پرڻي کي قبول ناهي ڪيو، هنن ان تي غيرت جو سوال اٿاريو آهي، غيرت قبيلي جي ماڻهن کي گڏ ڪيو آهي، سردار جي خلاف سرداري گهر جي ٻين مائٽن اعتراض واريو آهي ۽ سوال سردار جي تبديلي جو پيدا ٿيو آهي. اهو سرداري گهراڻي ۽ قبيلي جي اندر ڦڏو الڳ آهي ۽ رشتي ۾ ڳنڍجڻ واري قبيلي کي چيلينج ٿيڻ سبب انهن جي طرفان الڳ ڌمڪيون ڏنيون ويون آهن. هڪ وڏي فساد جي صورت پيدا ٿي پئي آهي. اها جهالت اسان کي الائي ڪٿي پهچائيندي.
سنڌ اڃان صديون اڳ واري دور ۾ ٿي رهي. قبيلائي تعصب سماج جا ترا ڪڍي ڇڏيا آهن. ماڻهو حيوانن جهڙي حال ۾ جيئن ٿا، جبلتن سان جيئن ٿا، پيري مريدي ۽ سرداري ماڻهن کي ڍورن جيان ٿي ڌاري، هڪلي ۽ واڙي رکي ٿي. ماڻهو وڏيرن جي حڪم تي اٿن ويهن ٿا، وٺ وٺ ڪرڻ تي وڙهڻ لڳن ٿا ۽ هڪل ڏيڻ تي هٿ ڪڍن ٿا. هڪ ڪوڙي غيرت، هٿرادو انا انسان جي ڪردار جي ڪٿ ٿي ڪري. قبيلائي تعصب سان ڪو نه ڪو جهيڙو آهي ئي آهي، مصيبت ذهن والاري ڇڏيا آهن، جهالتن سنڌ جي بيک ڪڍي ڇڏي آهي.
قبيلي کان ٻاهر شادي تي عجيب اعتراض آهي؟ جنهن کي نه شرعي وزن آهي نه قانوني حيثيت، اعتراض ڪرڻ وارن کي اعتراض به وري ڇوڪري ڏيڻ تي هوندو آ، وٺڻ تي نه هوندو آهي. اها سراسر جهالت آهي، اسان جي مذهب ۾ ان جو ڪو به تصور ڪونهي. اسان لاءِ پيروي جو وڏي ۾ وڏو نمونو پيغمبر آهي. نڪاح سنت آهي، رشتا شريعت جي طريقي سان ڳنڍبا آهن. اهو رشتو ۽ معاهدو سماجي آهي پر ٿيندو شريعت محمدي موجب آهي. شريعت ۾ اهڙي ڪابه پابندي ڪونهي. مذهب کانسواءِ ٻيو ڪو به تفاوت معنيٰ نٿو رکي. مسلڪ جو فرق به ڪا شئي ڪونهي. فرقو به فرق جو بيڪار بنياد آهي. اسان جنهن جا امتي آهيون ان هستيءَ اهي فرق ۽ ويڇا پيرن هيٺان لتاڙي ڇڏيا. پيغمبر اسلام ذات پات جا فرق مٽايا هئا تڏهن دين مڪمل ٿيو هو. مسلمانيت جو جهالت سان ڪو تعلق ڪونهي ڪو.
عجيب ڳالهه آهي، ماڻهو هٿرادو قانون ٺاهيو ويٺا آهن، جهالت ذهنن ۾ ۽ تعصب دلين ۾ ڪاهي پيو آهي. انسان انسان لاءِ غير بڻجي ويو آهي. تعلق هونئن ئي تند تي بيٺل آهن، تعصب اهي تندون به ڇني رهيو آهي. نسل به وڏائي ۽ ٻيائي جو بنياد بڻيو آهي، هڪ ذات جو پاڙو پاڙو پنهنجي الڳ سڃاڻپ ٿو رکي، هر ڪو پنهنجي ريت ٺاهي ٿو هلي. مسلمانيت به نه رهي آ، قوميت به نه رهي آهي. قوم ٽولن ۽ ٽڪرن ۾ ورهائي پئي آ، ڄڻ ڪو به پنهنجو ناهي، ڪو ڪنهن جو ناهي، هر ڪو ٻئي جي لاءِ ٻيو آ، ڪو ٻوليءَ جي بنياد تي ٻيو آ، ساڳئي ئي ٻولي جي لهجي ۽ ڀير جي بنياد تي وڇوٽيون آهن، هڪ ئي ديس پر اتر، لاڙ ۽ وچولي جون وڇوٽيون وڏي ڳالهه ٿي ويون آهن. هڪ ئي ذات ۾ پاڙن جي بنياد تي مائٽ مائٽن لاءِ ڌاريا آهن. جهالتن منهنجي سنڌ کي جاڏئون ڪاڏئون وڪوڙيو آ….
پنهنجائپ رڳو رت جي رشتي سان سمجهي وڃي ٿي، اهڙي رشتي ۾ وري لالچ جون ڪاتيون پيل آهن. مطلبن ماڻهن کي جاني دشمن بڻائي ڇڏيو آهي. مفاد جي ڪري ڀاءُ ڀاءُ جو ناهي. خود غرضي محبتن کي کائي وئي آهي. انسانيت پنهنجي مقام تان ڪري پئي آهي، اهڙي ڪا برائي ناهي جيڪا اسان ۾ ناهي، باقي ڪسر سياست پوري ڪري رهي آهي. سنڌ جي سياست جاهل وڏيري جي هٿ ۾ آهي، ڪيڏو به ڪو پڙهيل هجي پر سندس ووٽ وڏيري جو آهي. اهو ئي وڏيرو هيڏي اسان جي ننگ ۽ دنگ جا فيصلا ڪندو، هوڏي ايوان ۾ قانون به پنهنجي مطلب جا ٺاهيندو.

Bookmark the permalink.

Leave a Reply

Your email address will not be published. Required fields are marked *