تازا ترين
  • *سيوهڻ ۾ ايڪتا ثقافتي ڏهاڙي جي حوالي سان ريلي ڪڍي وئي، نوجوانن پاران قومي گيتن تي جهمريون *نوجوان اتحاد پاران جھاز چوڪ کان شاندار ايڪتا ريلي ڪڍي وئي، مختلف علائقن جو گشت*
  • *اسلام آباد بارڪائونسل جي 5 ميمبرز جي ڪاميابي جو نوٽيفڪيشن جاري ڪيو ويو *سيد قمر حسين سبزواري 1455 ووٽ حاص ڪري ميمبر بار ڪائونسل چونڊجي ويو *راجا حليم عباسي 1335، ذوالفقار عباسي 1101 ووٽ حاصل ڪيا:نوٽيفڪيشن*
  • *مورو ويجهو مبينا مقابلي دوران زخمي حالت ۾ گرفتار ڏوهاري سميت 3 ڄڻن خلاف ڪيس داخل *پوليس پاران زخمي ڏوهاري نذير عرف لوٽي جت برهماڻي سميت ٽن ڄڻن خلاف مقابلي جو ڪيس داخل*
  • *لاڙڪاڻو: ڦل روڊ تان اڻڄاتل شخص جو لاش هٿ، پوليس حدبندي جو جواز ڄاڻائي لاش اسپتال منتقل نه ڪيو *اطلاع باوجود پوليس ناهي پهتي، ڪيترن ئي ڪلاڪن کان لاش روڊ تي پيل آهي، نوٽيس ورتو وڃي: شهري*
  • *ٽنڊو محمد خان ۾ ڪورونا جي وڌيڪ 20 ڪيسن جي تصديق، متاثرن جو انگ وڌي 167 ٿي ويو *ڪورونا متاثرن ۾ 2 پي پي ايڇ آءِ جا ملازم ۽ 18 شهري شامل *ڪورونا متاثرن کي سندن گهرن ۾ آئيسوليٽ ڪيو ويو آهي: فوڪل پرسن*
  • *پرڏيهه ۾ به ايڪتا ڏهاڙي جا پڙاڏا، قطر جي دوها شهر ۾ ثقافتي پروگرام منعقد، قومي گيتن تي جهمريون *نواب ولي محمد واسي نوجوانن پاران ثقافتي ڏهاڙي تي قومي گيتن تي جهمريون هنيون ويون*
  • *مورو ويجهو مبينا مقابلي دوران زخمي حالت ۾ گرفتار ڏوهاري سميت 3 ڄڻن خلاف ڪيس داخل *پوليس پاران زخمي ڏوهاري نذير عرف لوٽي جت برهماڻي سميت ٽن ڄڻن خلاف مقابلي جو ڪيس داخل*

جوهي جي ڊوهي اٿئو..

اوهان رئيس ٿي سگهو ٿا، اوهان عوام جي ووٽن ذريعي چونڊيل ايم اين اي ٿي سگهو ٿا، اوهان وزير ٿي سگهو ٿا،اوهان پنهنجي برادي جا سردار ٿي سگهو ٿا پر اوهان جو اهو بيان ٻڌائي ٿو ته اوهان قطعي طور نه سياسي ماڻهو آهيو نه ئي اوهان عوامي اڳوڻ آهيو !
حيرت ٿي ٿئي انهي سياستدان تي جيڪو پاڻي لاءِ احتجاج ڪندڙ جوهي جي ماڻهن کي چئي ٿو ته اهي سياست ٿا ڪن.ها اهي ماڻهو واقعي سياست پيا ڪن ،ڇو ته جيڪا شيءَ نه ملندي آهي انهي لاءِ سياست ڪرڻي پوندي آهي ۽ هر ماڻهو جو اهو بنيادي حق آهي ته اهو سياست ڪري ۽ ان کي سياست ڪرڻ گهرجي.جڏهن ملڪ ۾ مارشل لا هو ته شهيد محترمه بينظير ڀٽو جمهوريت لاءِ سياست ڪئي هئي ۽ آمرن سان مهاڏو اٽڪايو هو جنهن خلاف اهي آمر ۽ انهن جا ڇاڙتا ئي آڏو آيا هيا ته هي عورت سياست ڪري رهي آهي ۽ جڏهن مشرف جي ڊڪٽيٽرشپ هئي تڏهن به محترمه بينظير ڀٽو جلاوطن هوندي به سياست ڪئي ۽ اهو ئي مشرف چوندو هو ته هي سياست ڪري رهي آهي، انهي کانپوءِ سياست کي لوئڻ ۽ خراب ڪرڻ لاءِ آمرن جا ڇاڙتا ئي ميدان تي ايندا رهيا جن پنهنجي ڪردار ذريعي سياست کي خوار ڪرڻ ۽ سياست لاءِ ماڻهن جي ذهنن ۾ خراب تاثر پيدا ڪرڻ جي ڪوشش ڪئي ۽ سياسي ماڻهن خلاف الزامن جي بوڇاڙ ڪئي .ڪنهن کان اهو جادوگر مولوي وسري ويو آهي جيڪو“سياست نهين رياست بچائو ” جو نعرو هڻي ڪفن پارائي ميدان تي لاٿو ويو هو. هاڻي جڏهن پ پ چيئرمين جي بقول سليڪٽيڊ حڪومت آهي تڏهن به اهو بلاول ڀٽو انهي خلاف سايست ذريعي ئي ميدان ۾ آهي ۽ انهي پارٽي جو چونڊيل ايم اين اي ۽ ڪنهن دور ۾ وزير رهندڙ پنهنجي پارٽي جي سياست بدران آمرن جي ٻولي ڳالهائي جوهي جي ماڻهن کي مهڻا ڏئي رهيو آهي ته اهي سياست ڪري رهيا آهن .رئيس صاحب اوهان سياست جي نالي ۾ پنهنجو اهو دڪان ته ڪجهه سال اڳ کوليو آهي پر جوهي جي جيڪا سنڌ ۾ سڃاڻپ آهي اها ته انهي سياست جي ڪري ئي آهي جڏهن هٿين خالي،هر سياسي پارٽي جا بي لوث ڪارڪن جوهي جي هر مسئلي تي گڏجي سياست ڪندا هيا، اوهان ته سياست کي پنهنجي خصيص مفادن ۾ رڳو برادري ۽ پارٽي جي مخصوص ڪارڪنن تائين محدود ڪري ڇڏيو آهي ڇو ته اوهان ته عوامي سياست ڪئي ناهي. تڏهن سمجهو ٿا ته جوهي جا ماڻهو به اوهان وانگر ئي ڪري رهيا آهن.اوهان جڏهن ايم اين اي چونڊجي ويا ته پوءِ رڳو اوهان پنهنجي پارٽي ۽ برادري جا ايم اين اي ناهيو،پر اوهان جي تڪ ۾ ايندڙ هر انهي ماڻهو جا به ايم اين اي آهيو جيڪو جبل جي ڪنهن جاڙ ۾ جهوپڙي اڏي ويٺو آهي انهي جي ڳالهه ٻڌڻ ۽ انهي جو مسئلو حل ڪرڻ جي ڪوشش ڪرڻ به اوهان جو ئي فرض آهي،هي پاڻي ته سڄي تعلقي جو مسئلو آهي جنهن جي حل لاءِ ڪوشش ڪرڻ اوهان جو فرض آهي ڀلي کڻي ڪو اوهان جو سياسي مخالف پاڻي جو نعرو هڻي ميدان ۾ لهي ان کي ٻڌڻ به اوهان جو فرض آهي. نه رئيس جوهي جي ماڻهن ۾ جيڪا سياست جي ڀڙڪندڙ باهه هئي جنهن کان آمر به ڊڄي جوهي جو رخ نه ڪندا هئا اها ڀلي کڻي اوهان جهڙن جي ڪري جهڪي ٿي هجي پر اها چڻنگ ڪٿي نه ڪٿي ،ڪنهن نه ڪنهن ڪنڊ ۾ دکي رهي آهي انهي کي مهڻن جا ڦوڪا نه ڏيو ته ڪٿي ڀڙڪو کائي ڀڀڙ نه بڻجي .
هر ساهه کڻڻ ئي سياست آهي زندگي جي هر مسئلي تي ڳالهائڻ ئي ته سياست آهي ،هر مسئلي کي حل ڪرڻ جي ڪوشش ئي ته سياست آهي.پاڻي ته پساهه آهي ان تي جوهي جا ماڻهو سياست ٿا ڪن ته اها ڪا خراب ڳالهه ناهي.
جوهي جنهن جي تعارف جا کوڙ حوالا آهن پر مونکي پنهنجي شهر جي سڃاڻپ جو اهو حوالو وڌيڪ وڻندو آهي ته اهو سياسي طور متحرڪ ماڻهن جو شهر رهيو آهي،ڀلي کڻي ٻين شعبن ۾ان شهر جا ماڻهو ڪٿي به پهتا هجن يا انهن پنهنجي سڃاڻپ ٺاهي هجي ،پر جوهي جي اصل سڃاڻپ ته اهو بشير ٿهيم آهي جيڪو شهرين جي مسئلن لاءِ پنهنجي پارٽي جي حڪمرانن آڏو ماٺ کي ڏوهه سمجهندو هو. پاڻي لاءِ هر جدوجهد ۾ اڳيان اڳيان ڀلا انهي حيدر سيال کي ڪير وساريندو جنهن وٽ پنهنجي ٻني جو ويسو به ناهي.شهمور ڪاري ڏاڙهي وارو امام علي رستماڻي پاڻي لاءِ پتوڙيندي پنهنجي ڏاڙهي اڇي ڪرائي ويٺو ڇا ان کي وساري سگهجي ٿو؟ ،اهو چاچو عمر جمالي به شهرين کان ناهي وسريو جيڪو سکيو ستابو زميندار ۽ واپاري هوندي به پاڻي لاءِ پنهنجن شهرين سان هر وقت هم آواز هوندو هو ۽ انهي شينهن رند کي ڪير ٿو وساري سگهي جنهن زرعي پاڻي لاءِ ماڻهن کي جدوجهد ڪرڻ سيکاري. جوهي جو تعارف رڳو اهو ناهي ته اها هر وقت احتجاج ۾ هوندي آهي جوهي جو تعارف ته اهو به هو ته اها ڪاڇي جي ڪڇ ۾ هوندي هڪڙو سکيو ستابو باغن ۽ فصلن وارو علائقو هو ،جتي مٺي پاڻي جي کڏن ۾ ڀرسان بيٺل جنجهيل ٻيرن مان ڇڻيل ٻير جڏهن پاڻي تي ترندا هيا ته تڙڳندڙ ٻار انهن تي لامارا ڏئي جهٽ هڻندا هيا. اها جوهي ڪنهن کان ٿي وسري جڏهن ٿوري برسات ٿيندي هئي ته نوجوانن جا ٽولا شهر جي پاسن کان بيٺل باغن جو رخ ڪندا هئا ۽ وڻن ۾ بيٺل تازا زيتون پٽي ڪچهريون ڪندا هئا.جوهي جي سڃاڻپ ته اها به هئي ته زمينن ۾ پوکيل سبزين مان ڪير پنهنجي گذر لاءِ ڪجهه سبزي پٽي کڻي ويو ته مالڪ سميت ڪير ان کي روڪيندو نه هو. جوهي جي سڃاڻپ ته اهي سڳداسي چانور به هيا جن جي سڳند پهرين پيار جي چمي جهڙي هئي جيڪا عمر جي آخري وقت تي به چپن تان لهڻ جو نالو نه وٺندي آهي.پر ڪجهه سالن کان جوهي کان اهڙا تعارف ڪنهن کسيا آهن،جتي غربت لامارا پئي ڏئي،ڪجهه سال اڳ تائين شاهوڪار رهندڙ اها جوهي ڪيترن سالن کان رڳو پنهنجي ڪڻڪ پوکڻ لاءِ پريشان آهي،اها جوهي پيئڻ جي پاڻي لاءِ پتوڙي پئي۽ اسان جا ئي چونڊيل نمائندا چون ٿا جوهي وارا سياست ٿا ڪن !؟
جوهي جي انهي ڀينگ جو ذميوار ڪير آهي؟ 15 سالن کان پ پ حڪومت ۾ آهي آبپاشي کاتو انهي صوبائي حڪومت جي ماتحت هوندو آهي اسان وارو اهو چونڊيل صاحب ٻڌائيندو ته انهي پاڻي معاملي تي گهڻا دفعا مٿي سطح تي ڳالهايو آهي يا ڪنهن آبپاشي وزير کي وٺي جوهي پهتو آهي ،جڏهن به گهڻي رڙ ٿيندي آهي ته ڪجهه ڏينهن لاءِ پاڻي ڇڏيو ويندو آهي ۽ پوءِ وري ساڳيا ڪاري وارا ڪک.مڃون ٿا ته پاڻي جي هر هنڌ کوٽ آهي پر اهڙي حالت ته ڪٿي به ناهي.تنهن ڪري اوهان کي جوهي جي ڊوهي آهي ته ماڻهن کي سياست ڪرڻ جا طعنا نه ڏيو، بلڪه انهن سان هم آواز ٿي لڳاتار رهندڙ پاڻي جو مسئلو حل ڪرائڻ جي ڪوشش ڪيو. اڳ ته اوهان جا مخالف حڪومت ۾ هيا ۽ منڍ ۾ به اهي ئي هيا جن تي الزام هوندو هيو ته اهي حڪومتي زور هوندي پاڻي چوري ڪري ويندا هيا هاڻ ته گذريل 15 سالن کان اوهان جي حڪومت آهي جيڪڏهن اوهان جا ئي مخالف منڍ وارا پاڻي چوري ۾ ملوث آهن ته پوءِ ڇو اوهان ايڏا بيوس آهيو جو انهن خلاف ڪا ڪارروائي نه ٿا ڪرائي سگهو ،جيڪڏهن وس نه ٿو هلي ته اهو ته ڪري سگهو ٿا ته عوام خلاف احتجاج ۾ گڏ بيهي نعرا هڻو ته جوهي کي پاڻي ڏيو.
نه خنجر چلي گا نه تلوار ان سي
يه بازو ميري آزمائي هوئي هين.
جيڪڏهن انهن ترن مان ڪو تيل نڪرڻو هجي ها ته سالن کان جوهي واسي ايئن پاڻي لاءِ سڪندا نه رهن ها،پر مونکي اميد جوهي جي انهن ماڻهن ۾ آهي جيڪي هر دور ۾ هر ڏاڍ خلاف بيٺا آهن هي مسلسل جدوجهد آ،اوهان جي تحريڪ کي هائجيڪ ڪرڻ جون ڪوششون به ٿينديون ،دلاسا به ملندا ته دڙڪا به ملندا، ڪي ٽپتائي اوهان جي تحريڪ ۾ شامل ٿي پنهنجو اگهه به لڳرائيندا ،پر اهو سڀڪجهه هوندي به انهن شهرين کي به جوهي جي ڊوهي آهي ته اهي ثابت قدم بيهي پنهنجي پاڻي لاءِ سياست جاري رکن،ڇو ته سياست ئي هر مسئلي جو حل آهي.ڇو ته سياست کي خراب چوڻ يا خراب ڪرڻ جو ٻيو مطلب اهو آهي ته ماڻهو پنهنجي بنيادي حقن تان هٿ کڻي ڇڏين .اها خواهش آمرن جي ٿي سگهي ٿي ڪنهن به سياسي ماڻهو جو اهڙو بيان حيرت سان گڏ ڪرهت جهڙو آهي .
اوهان رئيس ٿي سگهو ٿا، اوهان ووٽن ذريعي چونڊيل ايم اين اي ٿي سگهو ٿا، اوهان وزير ٿي سگهو ٿا،اوهان پنهنجي برادي جا سردار ٿي سگهو ٿا پر اوهان جو اهو بيان ٻڌائي ٿو ته اوهان قطعي طور نه سياسي ماڻهو آهيو نه ئي اوهان عوامي اڳواڻ آهيو.

Bookmark the permalink.

One Response to جوهي جي ڊوهي اٿئو..

Leave a Reply

Your email address will not be published. Required fields are marked *