ڪابينا ۾ ڦير ڦار ڪرڻ جو اعلان: معيشت مضبوط ٿي رهي آهي، ڏڦيڙ پکيڙيندڙ ناڪام ٿيا: شهباز

اسلام آباد(بيورو رپورٽ) وزيراعظم شهباز شريف چيو آهي ته وقت اچي ويو آهي ته ڪابينا ۾ نوان ماڻهو شامل ڪيا وڃن، وفاقي ڪابينا ۽ پارلياماني پارٽي جي اجلاس کي خطاب ڪندي شهباز شريف چيو ته معيشت مستحڪم ٿي رهي آهي، وياج جي شرح ۾ گهٽتائي سان ملڪ ۾ ڪاروباري سرگرمين، ايڪسپورٽ ۽ روزگار جي موقعن ۾ اضافو ٿيندو، پارلياماني پارٽي کي خطاب ۾ وزيراعظم چيو ته پاڪستان جي معيشت مستحڪم ٿي رهي آهي، اسٽيٽ بئنڪ پڻ وياج جي شرح ۾ 250 پوائنٽس جي گهٽتائي ڪري ڇڏي آهي. سود جي شرح ۾ 250 پوائنٽس جي گهٽتائي 17.5 سيڪڙو کان 15 سيڪڙو تائين خوش آمديد آهي. هن چيو ته سود جي شرح ۾ گهٽتائي سان ملڪ ۾ ڪاروباري سرگرميون، برآمدات ۽ روزگار جا موقعا وڌندا. مهانگائي جي شرح 38 سيڪڙو کان گهٽجي 7 سيڪڙو تي اچي وئي. وزير اعظم چيو ته ملڪ ۾ افراتفري پکيڙڻ ۽ ملڪ کي تباهي جي ڪناري تي آڻيندڙن جا ناپاڪ منصوبا ناڪام ٿيا. ملڪ جي بقا لاءِ سياست ڪندڙن کي تاريخ هميشه ياد رکندي. مورخ جڏهن تاريخ لکندو ته ملڪ جي ڀلائي وارن ۽ آءِ ايم ايف کي قرض ڏيڻ بند ڪرڻ لاءِ خط لکڻ وارن بابت واضح لکندو. هن چيو ته قطر پاڪستان جي هوائي اڏي، هوٽلنگ، انفارميشن ٽيڪنالاجي ۽ توانائي سميت مختلف شعبن ۾ سيڙپڪاري ڪندو.  ٻئي طرف وفاقي ڪابينا جي اجلاس کي خطاب ڪندي وزيراعظم سعودي عرب ۽ قطر جي دوري جي حوالي سان وفاقي ڪابينا کي اعتماد ۾ ورتو. هن چيو ته قطر جي امير پاران ماضي ۾ ٽن ارب ڊالرن جي سيڙپڪاري جي حوالي سان ڪيل واعدي تي عمل ڪرڻ جو فيصلو ڪيو ويو آهي، قطر انويسٽمينٽ اٿارٽي جو چيئرمين ۽ سندس ٽيم جلد پاڪستان جو دورو ڪندي. وزيراعظم چيو ته سعودي عرب ۾ آءِ ٽي سميت مختلف شعبن ۾ لکين باصلاحيت ماڻهن جي ضرورت آهي، سعودي ولي عهد پاڪستان کي ماهر افرادي قوت موڪلڻ جو چيو آهي، اهڙي طرح قطر جي امير پاڪستان ۾ آءِ ٽي پارڪ قائم ڪرڻ جو اشارو ڏنو آهي