لاڙڪاڻي شهر ۽ ڀرپاسي ڪتن جو آزار، 17 ڄڻن کي ڏاڙهي وڌو

لاڙڪاڻو(بيورو رپورٽ) لاڙڪاڻي شهر ۽ ڀروارن علائقن ۾ رولو ڪتن جو آزار گھٽجي نه سگهيو، رولو ڪتن هڪ ئي ڏينهن مختلف علائقن ۾ 17 ڄڻن کي ڏاڙهي زخمي ڪري ڇڏيو آهي جن ۾ جنت بيبي، رخسانا، سجاد علي، مدثر، غلام سرور، فضا، سرفراز ۽ ٻيا شامل آهن، ڪتي ڏاڙهيل زخمين کي سندن وارثن طرفان ڌار ڌار کڻائي چانڊڪا اسپتال جي ايمرجنسي وارڊ ۾ قائم ويڪسين سينٽر منتقل ڪيو جتي سمورن زخمين کي ويڪسين ۽ طبي امداد ڏئي گهر روانو ڪيو ويو. ان حوالي سان ويڪسين سينٽر جي عملي ٻڌايو ته رولو ڪتن جي ڏاڙهيل زخمين جو تعلق لاڙڪاڻي شهر ۽ ڀروارن علائقن سان آهي جن ۾ مرد، عورتون ۽ ٻارڙا شامل آهن، سينٽر آيل سمورن زخمين کي بروقت ويڪسين ۽ طبي امداد ڏئي گهر روانو ڪيو ويو ٻئي طرف ڪتي جي ڏاڙهيل زخمين جي وارثن ضلعي انتظاميه کان گهر ڪئي آهي ته جلد ڪتا مار مهم شروع ڪري رولو ڪتن جي آزار کان بچايو وڃي.