ميرپورخاص ويجهو ڪراچي واسي ٻه ڀائر برساتي پاڻي جي کڏ ۾ ٻڏي فوت

ميرپورخاص(بيورو رپورٽ)ميرپورخاص لڳ برساتي پاڻي جي بيٺل کڏ ۾ ڪري، 2 معصوم ڀائر فوت، خبر موجب ميرپورخاص لڳ بلوچ آباد ڀرسان ڳوٺ عبداللھ آباد ۾ برساتي پاڻيءَ سبب ڀريل کڏ ۾ ڪرڻ سبب ڪراچي واسي 2 معصوم ڀائر 9 سالن جو محمد ۽ 6 سالن جو ابوبڪر ولد عمران مڪراني ٻڏي ويا، جن کي سندن والدين سول اسپتال ميرپورخاص کڻي پھتا، جتي ڊاڪٽرن سندن زندگيون بچائڻ جي ڪوشش ڪئي پر ھو اڳ ئي فوت ٿي چڪا ھئا. ٻئي معصوم ٻارڙا پنھنجي والدين سان گڏ ڪراچي جي علائقي لياري کان پنھنجن ويجھن عزيزن وٽ گھمڻ لاءِ آيل ھئا ۽ راند کيڏندي کڏ ۾ ڪري پيا، جنھن سبب فوت ٿي ويا. معصوم ٻارڙن جي فوت ٿيڻ تي سندن گھرن ۾ ڪھرام متل آھي، سندن والدين کي بيهوشيءَ جا دورا پئجي رهيا آهن.