پ پ پاران ٿرپارڪر ضلعي ڪائونسل لاءِ ڊاڪٽر غلام حيدر سميجو چيئرمين ۽ ڪملا ڀيل وائيس چيئرمين جا اميدوار نامزد

مٺي(رپورٽ: ممتاز نهڙيو) ٿرپارڪر ضلع جي ضلع ڪائونسل ميونسپل ۽ ٽائون ڪميٽيز تي چيئرمن ۽ نائب چيئرمن لاء اميدوارن جا نالا فائنل ٿي ويا،  ڊاڪٽر غلام حيدر سميجو ٿرپارڪر ضلعي ڪائونسل لاءِ چيئرمين ۽ ڪملا ڀيل وائيس چيئرمين جا اميدوار نامزد ڪيا ويا.

تفصيل موجب بلدياتي اليڪشن جي حوالي سان زرداري هائوس ڪراچي ۾ فريال ٽالپر ، نثار احمد کهڙو ۽ ضياء حسين لنجار جي صدارت هيٺ ٿيل اجلاس ۾ صوبائي صلاحڪار ارباب لطف، ضلعي صدر انجنيئر گيانچند، ڊاڪٽر مهيش ڪمار ملاڻي، پير امير علي شاهه جيلاني، ڊاڪٽر کٽومل جيوڻ، سريندر ولاسائي، دوست علي راهمون سميت مختلف اسٽيڪ هولڊرن شرڪت ڪئي.

هي به پڙهندا : ڀرياسٽي ٽائون لاءِ پ پ پاران امير شاهه چيئرمين نامزد

ان موقعي تي  ٿرپارڪر ضلعي جي هڪ ضلعي ڪائونسل، هڪ ميونسپل ڪاميٽي ۽ پنج ٽائون ڪاميٽين تي چيئرمين ۽ وائيس چيئرمين نامزد ڪيا ويا، حتمي لسٽ جاري ڪئي ويندي. اجلاس ۾ ٿرپارڪر ضلعي ڪائونسل لاء ڊاڪٽر غلام حيدر سميجو چيئرمين ۽ ڪملا ڀيل کي وائيس چيئرمين نامزد ڪيو ويو

جڏهن ته  ميونسپل ڪاميٽي مٺي لاء ڊاڪٽر منوج ملاڻي چيئرمين ۽ سمترا منجياڻي وائيس چيئرمين نامزد ڪيو ويو، اسلام ڪوٽ ٽائون ڪميٽي لاء ڪمل ڪمار لهاڻو چيئرمين ۽ انيل ميگھواڙ کي وائيس چيئرمين بڻايو ويندو، کيمي جو پار ٽائون ڪميٽي لاء ممتاز راهمون چيئرمين ۽ ناٿو خان راهمون وائيس چيئرمين نامزد ڪيا ويا.

ڇاڇرو ٽائون ڪميٽي لاء چيئرمين مرتضي بجير ، وائيس چيئرمين محمد ايوب مڱريو کي نامزد ڪيو ويو، ڏيپلو ٽائون ڪميٽي لاء نواز جوڻيجو چيئرمين ۽ ميٺارام ميگھواڙ کي وائيس چيئرمين نامزد ڪيو ويو.ٽائون ڪميٽي چيلهار تي بهاري لال ميگهواڙ چيئرمن ۽ عرس ڪنڀار نائب چيئرمن نامزد ڪيو ويو.