حڪومت شگرملز مالڪن آڏو گوڏا کوڙي ڇڏيا، اگهه نه وڌڻ جي شرط تي کنڊ ايڪسپورٽ ڪرڻ جي اجازت

اسلام آباد: (بيورو رپورٽ) شوگر ايڊوائزري بورڊ شوگر ملز مالڪن جي درخواست تي کنڊ برآمد ڪرڻ جي اجازت ڏئي ڇڏي آهي. ذريعن موجب، وقافي سرڪار واڌو کنڊ برآمد جي اجازت ڏيڻ جي تياري ڪري ورتي آهي ۽ پهرئين مرحلي ۾ ڏيڍ لک ميٽرڪ ٽن کنڊ برآمد جي اجازت ڏيڻ جو فيصلو ڪيو ويو آهي. ذريعن جو چوڻ آهي ته کنڊ جي برآمد لاءِ سمري جلد اي سي سي ۾ پيش ڪرڻ جو فيصلو ڪيو ويو آهي، وڌيڪ کنڊ جي برآمد جو فيصلو مارڪيٽ ۾ کنڊ جي قيمت کي نظر ۾ رکي ڪيو ويندو. ذريعن جو اِهو به چوڻ آهي ته کنڊ جي ايڪس مل جي في ڪلو قيمت 140 رپيا مٿي وڃڻ نه ڏبي، حڪومت ۽ شوگر ملز ايسوسيئيشن وچ ۾ معاهدو ٿيندو ۽ مارڪيٽ ۾ کنڊ جا اگهه وڌڻ نه ڏنا ويندا. ذريعن موجب، شوگر ملز مالڪن 15ميٽرڪ ٽن کنڊ برآمد جو مطالبو ڪيو هو ۽ پهرئين مرحلي ۾ پنج لک ٽن کنڊ جي برآمد لاءِ اجازت گهري وئي هئي. ذريعن موجب، وزيراعظم طرفان ويجهڙائي ۾ کنڊ جي برآمد جو جائزو وٺڻ جون هدايتون جاري ڪيون ويون هيون. اجلاس بعد صنعت ۽ پيداوار جي وفاقي وزير رانا تنوير چيو آهي ته کنڊ جي ايڪس مِل اگهه ۾ ڪنهن به صورت ۾ واڌ نه ٿيندي، مستقبل ۾ کنڊ ايڪسپورٽ جو آپشن اگهن ۽ اسٽاڪ سان جُڙيل هوندو، شگر ايڊوائيزري بورڊ 15 ڏينهن ۾ کنڊ جي اگهه ۽ مارڪيٽ استحڪام جو ٻيهر جائزو وٺندو، آبادگارن کي ترجيحي بنيادن تي رهتون ادا ڪيو وينديون.